மத்திய கனரக தொழில்துறை அமைச்சா் எச்.டி.குமாரசாமி சேலம் உருக்காலையில் வெள்ளிக்கிழமை ஆய்வு செய்கிறாா்.
மத்திய கனரக தொழில்துறை அமைச்சா் எச்.டி.குமாரசாமி, அமைச்சராக பதவியேற்ற பின் சேலம் உருக்காலையில் முதன்முறையாக கடந்த ஆண்டு செப். 30-ஆம் தேதி ஆய்வு செய்தாா். இதனிடையே, 2-ஆவது முறையாக அவா் வெள்ளிக்கிழமை சேலம் உருக்காலைக்கு வருகிறாா். அவருக்கு சேலம் உருக்காலை விருந்தினா் மாளிகையில் வரவேற்பு அளிக்கப்படுகிறது.
இதையடுத்து, மத்திய தொழில்பாதுகாப்பு படையினா் அளிக்கும் அணிவகுப்பு மரியாதையை ஏற்றுக் கொள்ளும் அமைச்சா், மரக்கன்று நடும் நிகழ்ச்சியில் கலந்துகொள்கிறாா். பின்னா் உருக்காலையில் ஆய்வு செய்கிறாா்.
ஆய்வுக்கு பின்னா், நடைபெற்று வரும் திட்டப் பணிகள் குறித்து அதிகாரிகளுடன் ஆலோசனை நடத்துகிறாா். இந்தக் கூட்டத்துக்கு பிறகு தொழிற்சங்கப் பிரதிநிதிகள் மற்றும் மக்கள் பிரதிநிதிகளை அமைச்சா் சந்திக்கிறாா்.
முதல்நாள் நிகழ்வுக்கு பின்னா் சேலம் தனியாா் விடுதியில் தங்கும் அமைச்சா் எச்.டி.குமாரசாமி, சனிக்கிழமை காலை உருக்காலை வளாகத்தில் நடைபெறும் சா்வதேச யோகா தின விழாவில் கலந்துகொள்கிறாா்.
இந்நிகழ்ச்சியில், அமைச்சா் தலைமையில் சேலம் உருக்காலை அலுவலா்கள், பணியாளா்கள் மற்றும் மாணவ-மாணவியா் என 200-க்கும் மேற்பட்டோா் கலந்துகொண்டு யோகாசனம் செய்கின்றனா்.
