சேலம் டவுன் நிலையத்தில் ரயில்கள் நின்றுசெல்லும் நேரம் 3 நிமிஷங்கள் அதிகரிப்பு

ஜூலை 4 முதல் சென்னை எழும்பூா் - சேலம் அதிவிரைவு ரயில் இருமாா்கத்திலும் சேலம் டவுன் நிலையத்தில் நின்று செல்லும் நேரம் 3 நிமிஷங்களாக அதிகரிக்கப்பட்டுள்ளது.

இதுகுறித்து தெற்கு ரயில்வே திங்கள்கிழமை விடுத்துள்ள செய்திக் குறிப்பு:

சென்னை எழும்பூரில் இருந்து இரவு 11.55 மணிக்குப் புறப்பட்டு சேலத்துக்கு மறுநாள் காலை 6 மணிக்கு செல்லும் அதிவிரைவு ரயில் (எண்: 22153), சேலம் டவுன் ரயில் நிலையத்தில் வழக்கமாக அதிகாலை 5.34 மணிக்கு நின்று 5.35 மணிக்கு செல்லும்.

இந்த ரயில் ஜூலை 4-ஆம் தேதியிலிருந்து சேலம் டவுன் ரயில் நிலையத்துக்கு அதிகாலை 5.32 மணிக்கு வந்து பிறகு 5.35 மணிக்கு புறப்படும் என அறிவிக்கப்பட்டுள்ளது.

மறுமாா்க்கத்தில் சேலத்திலிருந்து சென்னை எழும்பூருக்கு செல்லும் அதிவிரைவு ரயில் (எண்: 22154) வழக்கமாக இரவு 11.39 மணிக்கு வந்து பிறகு 11.40 மணிக்கு புறப்படும். இந்த ரயில் இரவு 11.37 மணிக்கு டவுன் ரயில் நிலையத்துக்கு வந்து பிறகு 11.40 மணிக்குப் புறப்படும் எனத் தெரிவிக்கப்பட்டுள்ளது.