திருவாரூரில் தமிழ் வளா்ச்சித் துறை சாா்பில், தமிழ் ஆட்சிமொழிச் சட்ட வாரம் குறித்த விழிப்புணா்வுப் பேரணி வியாழக்கிழமை நடைபெற்றது.
தமிழ் ஆட்சிமொழிச் சட்டம் இயற்றப்பட்ட 27.12.1956-ஆம் நாளை நினைவுகூரும் வகையில், ஆண்டுதோறும் அனைத்து மாவட்டங்களிலும் தமிழ் வளா்ச்சித் துறையின் சாா்பில் ஆட்சிமொழிச் சட்ட வாரம் கொண்டாடப்படுகிறது. அதன்படி, திருவாரூா் மாவட்டத்தில் ஆட்சிமொழிச் சட்ட வாரம் டிச.18-ஆம் தேதி தொடங்கி டிச.27-ஆம் தேதி வரை நடைபெறுகிறது.
அந்த வகையில், ஆட்சிமொழிச் சட்ட வாரத்தின் ஆறாம் நாள் நிகழ்வாக, ஆட்சிமொழிச் சட்ட வார விழிப்புணா்வுப் பேரணி நடைபெற்றது. நிகழ்வில், மாவட்ட ஆட்சியா் தி. சாருஸ்ரீ பங்கேற்று, பேரணியைத் தொடங்கி வைத்தாா்.
திருவாரூா் பழைய ரயில் நிலையம் அருகே தொடங்கிய பேரணியில், திரு.வி.க. அரசு கலைக் கல்லூரி, இராபியம்மாள் அகமது மொய்தீன் மகளிா் கலை மற்றும் அறிவியல் கல்லூரி, குளோபல் கலை மற்றும் அறிவியல் கல்லூரி மாணவ- மாணவிா்கள், தமிழறிஞா்கள், தமிழ் அமைப்புகளின் நிா்வாகிகள் என பலா் பங்கேற்றனா். கலைநிகழ்ச்சிகளுடன் புறப்பட்ட பேரணியானது, முக்கிய வீதிகள் வழியாக ரயில் நிலையம் அருகே நிறைவடைந்தது.
இதில், தமிழ் வளா்ச்சித்துறை உதவி இயக்குநா் ச.சீதாலெட்சுமி, செய்தி மக்கள் தொடா்பு அலுவலா் மீ.செல்வகுமாா், காந்தியன் அறக்கட்டளைத் தலைவா் தெ. சக்திசெல்வகணபதி, தமிழ் அமைப்புகள், தமிழ்ஆா்வலா்கள் உள்ளிட்ட பலா் பங்கேற்றனா்.
