திருப்பத்தூரில் ‘உங்களுடன் ஸ்டாலின்‘திட்ட முகாம்: 45 நாள்களுக்குள் தீா்வு காண ஆட்சியா் அறிவுறுத்தல்

திருப்பத்தூா் மாவட்டத்தில் நடைபெற்ற 6 முகாம்களில் பெறப்பட்டுள்ள மனுக்களுக்கு 45 நாள்களுக்குள் தீா்வு காண வேண்டும் என அதிகாரிகளுக்கு ஆட்சியா் க.சிவசௌந்திரவல்லி அறிவுறுத்தினாா்.

திருப்பத்தூா் மாவட்டம், திருப்பத்தூா் நகராட்சிக்குட்பட்ட தா்கா தெரு பகுதியில் உள்ள தனியாா் திருமண மண்டபத்தில் செவ்வாய்க்கிழமை நடைபெற்ற ‘உங்களுடன் ஸ்டாலின்’ திட்ட முகாமில் பொதுமக்களிடமிருந்து மனுக்களை துறை சாா்பாக பெறப்படுவதை பாா்வையிட்டு, கலைஞா் மகளிா் உரிமைத் தொகை பெற விண்ணப்பித்த பயனாளிக்கு ஒப்புகை சீட்டு மற்றும் பட்டா மாறுதலுக்கான ஒப்புகை சீட்டுகளை ஆட்சியா் க.சிவ.சௌந்திரவல்லி வழங்கினாா்.

மேலும், கந்திலி ஒன்றியத்துக்குள்பட்ட கெஜல்நாயக்கன்பட்டி தனியாா் திருமண மண்டபத்திலும், பாச்சல் நகர ஊராட்சிக்குள்பட்ட பாச்சல் புதுப்பேட்டை சாலை பகுதியில் உள்ள தனியாா் திருமண மண்டபத்திலும் நடைபெற்ற ‘உங்களுடன் ஸ்டாலின்’ திட்ட முகாம்களை சம்பந்தப்பட்ட எம்எல்ஏ-க்கள் மற்றும் உள்ளாட்சி அமைப்புகளின் பிரதிநிதிகள் பாா்வையிட்டனா்.

இந்த முகாம்களில் நகா்ப்புற பகுதிகளில் 13 அரசுத் துறைகளைச் சாா்ந்த 43 சேவைகளும், ஊரகப் பகுதிகளில் 15 துறைகளைச் சாா்ந்த 46 சேவைகளும் அத்துடன் மருத்துவ முகாம்களுக்கும் ஏற்பாடு செய்யப்பட்டிருந்தது.

‘உங்களுடன் ஸ்டாலின்’ திட்டத்தில் திருப்பத்தூா் மாவட்டத்தில் நடைபெற்ற 6 முகாம்களில் மனுக்கள் பெறப்பட்டுள்ளன. இந்த மனுக்களை சம்பந்தப்பட்ட துறை அலுவலா்களிடம் வழங்கி, 45 நாள்களுக்குள் தீா்வு காண வேண்டும் என ஆட்சியா் உத்தரவிட்டுள்ளாா்.

இதில், தனித்துணை ஆட்சியா் (ச.பா.தி) சதீஷ்குமாா், நகா்மன்றத் தலைவா் சங்கீதா வெங்கடேஷ், துணைத் தலைவா் சபியுல்லா, ஆணையா் சாந்தி மற்றும் சம்பந்தப்பட்ட துறை அலுவலா்கள் கலந்துகொண்டனா்.