`திருமணத்துக்கு சம்மதிக்கவில்லை’ - கிணற்றில் சடலமாக கிடந்த இளம்பெண்; சரணடைந்த காதலன்; நடந்தது என்ன?

திருவண்ணாமலை மாவட்டம், கலசப்பாக்கம் அருகேயுள்ள பாடகம் கிராமத்தைச் சேர்ந்தவர் வேல்முருகன். இவரின் 22 வயது மகள் ரோஷினி. கல்லூரி படிப்பை முடித்த ரோஷினி காவல்துறை பணியில் சேர விருப்பப்பட்டு, கலசப்பாக்கம் அருகில் விண்ணுவாம்பட்டு பகுதியிலுள்ள தனியார் பயிற்சி மையத்தில் சேர்ந்து உடற்திறன் தேர்வு குறித்து பயிற்சி பெற்றுவந்தார். கலசப்பாக்கம் அருகிலுள்ள அலங்காரமங்கலம் கிராமத்தைச் சேர்ந்த பரசுராமன் மகன் சக்திவேல் (29) என்பவரும், இதே மையத்தில் பயின்றுவந்தார். பயிற்சி மையத்தில் சந்திக்கும்போது, இருவருக்கும் பழக்கம் ஏற்பட்டுள்ளது. பேசி பழகியதில் இருவரும் காதலித்து வந்ததாகவும் சொல்லப்படுகிறது.

இதற்கிடையே, கருத்து வேறுபாடு காரணமாக சமீப நாள்களாக இருவருக்குள்ளும் அடிக்கடி தகராறு ஏற்பட்டதால், சக்திவேலிடம் இருந்து ரோஷினி விலகிச் செல்ல முடிவெடுத்ததாகவும் கூறப்படுகிறது.

அதன் பிறகு, பயிற்சி மையத்தில் சந்திக்கும்போதும் சக்திவேலிடம் பேசுவதை தவிர்த்து வந்திருக்கிறார் ரோஷினி. இந்த நிலையில்தான் வழக்கம்போல் நேற்று முன்தினம் பயிற்சி வகுப்புக்கு சென்றுவிட்டு, இரவு 7 மணியளவில் வீடு திரும்பிகொண்டிருந்தார் ரோஷினி. பாடகம் - மன்சூராபாத் சாலையில் ரோஷினியை மறித்த சக்திவேல் அவரிடம் மீண்டும் காதலிக்க வற்புறுத்தி தகராறில் ஈடுபட்டிருக்கிறார். அதன் பிறகு ரோஷினி வீடு திரும்பவில்லை. 9 மணியாகியும் மகள் வீடு வந்து சேராததால் அதிர்ச்சிக்குள்ளான பெற்றோர் பல்வேறு இடங்களில் தேடத் தொடங்கினர். மங்கலம் காவல் நிலையத்துக்கு சென்றும் உடனடியாக புகாரளித்தனர்.

இதற்கிடையே, சக்திவேல் நள்ளிரவில் போளூர் காவல் நிலையத்துக்கு திடீரென சென்று சரணடைந்தார். ``தனது காதலி ரோஷினியின் சடலம் பாடகம் கிராமத்தில் உள்ள ஒரு விவகாய கிணற்றில் கிடக்கிறது. நாங்கள் இருவரும் காதலித்துவந்தோம். ஆனாலும், ரோஷினிக்கு திருமணம் செய்துவைக்க அவளின் பெற்றோர் வரன் பார்த்துவந்தனர். எனக்குத் தெரியவந்ததும் சம்பவத்தன்று இரவு சந்தித்து சமாதானம் பேச முயன்றதோடு, `நாம் திருமணம் செய்துகொள்ளலாம்’ எனவும் வற்புறுத்தினேன். அவள் சம்மதிக்க மறுத்ததால் கோபப்பட்டு கன்னத்தில் அறைந்தேன். அவள் உணர்ச்சிவசப்பட்டு அருகிலுள்ள கிணற்றில் குதித்துவிட்டாள்’’ என்று கூறியிருக்கிறார். போலீஸாரும் திடுக்கிட்டு, மங்கலம் காவல் நிலையத்துக்கு தகவல் கொடுத்தனர்.

நேற்று விடிந்ததும், போலீஸார் அந்த கிணற்றுப் பகுதிக்கு விரைந்தனர். தகவலறிந்ததும் ரோஷினியின் குடும்பத்தினரும், உறவினர்கள் சம்பவ இடத்துக்கு ஓடிவந்து கதறி அழுதனர். ரோஷினியின் உடலை கிணற்றில் இருந்து மீட்டு மேலே கொண்டுவந்தபோது மேலும் ஒரு அதிர்ச்சி காத்திருந்தது. சரணடைந்த சக்திவேல், ரோஷினியே கிணற்றில் குதித்துவிட்டதாக கூறியிருந்தார். ஆனால், ரோஷினியின் தலையில் பலத்த காயங்கள் இருந்தன. கழுத்தையும் பலமாக நெரித்ததைபோல் தடயங்கள் காணப்பட்டன.

இதையடுத்து, பிரேத பரிசோதனைக்காக உடல் திருவண்ணாமலை அரசு மருத்துவமனைக்கு அனுப்பி வைக்கப்பட்டன. பிரேத அறிக்கை கிடைத்த பிறகே உயிரிழப்புக்கான காரணத்தை உறுதியாக கூறமுடியும் என்கின்றனர் போலீஸார். அதே சமயம், சக்திவேலையும் கைது செய்த போலீஸார் அவரிடம் உண்மை கண்டறியும் முயற்சியில் தீவிரமாக விசாரணை நடத்தி வருகின்றனர். இந்த சம்பவம், அந்தப் பகுதியில் பெரும் அதிர்ச்சியை ஏற்படுத்தியிருக்கிறது.

வேட்டை நாய்கள் - Gangs of தூத்துக்குடி -இப்போது விகடன் ப்ளேயில்..!

Link : Part 01 : https://tinyurl.com/Vettai-Naigal-Part-01 |

Part 02: https://tinyurl.com/Vettai-Naigal-Part-02 |

80களில் தூத்துக்குடியை மிரள வைத்த டான்களின் கதை வேட்டை நாய்கள் - Gangs of தூத்துக்குடி இப்போது Audio formatல் உங்கள் Vikatan Playல். இப்பவே Vikatan APPஐ Download செய்யுங்கள் Play Iconஐ Click பண்ணி வேட்டை நாய்கள் கேளுங்க | #Vikatan #VikatanPlay #AudioBooks