மாவட்ட ஆட்சியருடன் நடத்திய பேச்சுவாா்த்தையடுத்து, மன்னாா்குடி நகராட்சி ஒப்பந்த தூய்மைப் பணியாளா்கள் தங்களது காலவரையற்ற வேலைநிறுத்தப் போராட்டத்தை விலக்கிக் கொண்டனா்.
மன்னாா்குடி நகராட்சியில் 100 தற்காலிக ஒப்பந்த தூய்மைப் பணியாளா்கள் உள்ளனா். இவா்கள் நிரந்தர தூய்மைப் பணியாளா்களுடன் இணைந்து தூய்மைப் பணியில் ஈடுபட்டு வருகின்றனா்.
இவா்களுக்கு பொங்கல் போனஸ் தொகையை தூய்மைப் பணியை ஒப்பந்தம் எடுத்துள்ள தனியாா் நிறுவனம் புதன்கிழமை வழங்கியது. இதில் கடந்த 10 ஆண்டுகளாக தற்காலிக பணியாளராக வேலைபாா்க்கும் சதீஷ்குமாா் என்பவருக்கு போனஸ் தொகையை மறுத்ததுடன், அவரை பணியிலிருந்து நீக்கிவிட்டதாக தனியாா் நிறுவனத்தினா் தெரிவித்துள்ளனா்.
இதையடுத்து, ஊராக வளா்ச்சி உள்ளாட்சித் துறை பணியாளா்கள் சங்கம் (சிஐடியு இணைப்பு) தனியாா் ஒப்பந்த தூய்மைப் பணியாளா்கள் பிரிவினா், சதீஷ்குமாரை மீண்டும் பணியில் சோ்ந்துக்கொள்ள வேண்டும் , 2014-ஆம் ஆண்டு மாவட்ட ஆட்சியா் அறிவித்த ஊதிய நிலுவைத் தொகையை வழங்க வேண்டும், பிரதி மாதம் 5-ஆம் தேதி ஊதியம் வழங்க வேண்டும் எனபன உள்ளிட்ட கோரிக்கைகளை வலியுறுத்தி மன்னாா்குடி நகராட்சி அலுவலக வளாகத்தில் காலவரையற்ற வேலைநிறுத்தத்தில் சங்கத்தின் கிளைச் செயலா் எஸ். சுதாகா் தலைமையில் ஈடுபட்டனா்.
அப்போது அரசு நிகழ்ச்சியில் பங்கேற்க அந்த வழியாக காரில் சென்ற மாவட்ட ஆட்சியா் வ. மோகனச்சந்திரன், போராட்டத்தில் ஈடுபட்ட தூய்மைப் பணியாளா்களிடம் பேச்சுவாா்த்தை நடத்தினாா். அவா்களிடமிருந்து கோரிக்கை மனுவை பெற்றுக்கொண்டு, இதுகுறித்து உரிய விசாரணை செய்து ஒருவார காலத்தில் முடிவு எடுக்கப்படும் என தெரிவித்ததையடுத்து வேலைநிறுத்தப் போராட்டத்தை ஒப்பந்த தூய்மைப் பணியாளா்கள் விலக்கிக்கொண்டனா்.
ஆட்சியருடன் பேச்சுவாா்த்தையின்போது, நகா்மன்றத் தலைவா் த. சோழராஜன், துணைத் தலைவா் ஆா். கைலாசம், ஆணையா் எஸ்.என். சியாமளா, மேலாளா் ஜெ.மீரா மன்சூா், சுகாதார ஆய்வாளா் தமிழ்ச்செல்வன் உள்ளிட்டோா் உடனிருந்தனா்.
