தெலங்கானாவில் பிற்படுத்தப்பட்ட சமூகத்தினா் 46.25% : ஜாதிவாரி கணக்கெடுப்பு தரவுகள் வெளியீடு

தெலங்கானாவின் 3.70 கோடி மக்கள்தொகையில் 46.25 சதவீதத்தினா் முஸ்லிம் அல்லாத பிற்படுத்தப்பட்ட சமூகத்தினா் என்பது அந்த மாநிலத்தில் நடத்தப்பட்ட ஜாதிவாரி கணக்கெடுப்பில் தெரிய வந்துள்ளது.

காங்கிரஸ் ஆளும் தெலங்கானா மாநிலத்தில் கடந்த சட்டப்பேரவைத் தோ்தல் பிரசாரத்தில் மக்களவை எதிா்க்கட்சித் தலைவா் ராகுல் காந்தியால் அளிக்கப்பட்ட வாக்குறுதியான ஜாதிவாரி கணக்கெடுப்பு, கடந்த ஆண்டு நவம்பா் மாதம் 6-ஆம் தேதி தொடங்கி 50 நாள்களுக்கு நடைபெற்றது.

மாநில திட்டத் துறையால் மேற்கொள்ளப்பட்ட இந்தக் கணக்கெடுப்பின் முடிவுகள் அடங்கிய அறிக்கை, அமைச்சரவை துணைக் குழுவுக்குத் தலைமை வகிக்கும் மாநில பொது விநியோகத் துறை அமைச்சா் என்.உத்தம் குமாா் ரெட்டியிடம் ஞாயிற்றுக்கிழமை சமா்பிக்கப்பட்டது.

அந்த அறிக்கையின்படி, மாநில மக்கள்தொகையான 3.70 கோடி பேரில் 96.9 சதவீதமான 3,54,77,554 தனிநபா்கள் இக்கணக்கெடுப்பில் பங்கேற்றுள்ளனா். அதாவது மாநிலத்தில் உள்ள மொத்த குடும்பங்களான 1,15,78,457-இல் 1,12,15,134 குடும்பங்கள் கணக்கெடுப்பில் பங்கேற்றன. மக்கள்தொகையில் 3.1 சதவீதமான 16 லட்சம் போ் குறித்த தரவுகள் கிடைக்கவில்லை அல்லது கணக்கெடுப்பில் பங்கேற்க ஆா்வம் காட்டாததால் அவா்கள் விடுபட்டுள்ளனா்.

இந்தக் கணக்கெடுப்பு அறிக்கை மாநில அமைச்சரவையில் வரும் செவ்வாய்க்கிழமை சமா்ப்பிக்கப்படவுள்ளது. மேலும் அன்றைய நாளில் கூடும் தெலங்கானா சட்டப்பேரவையின் சிறப்பு கூட்டத்தொடரிலும் அறிக்கை தாக்கல் செய்யப்பட்டு, விவாதம் நடைபெறும் என்று அமைச்சா் உத்தம் குமாா் ரெட்டி கூறினாா்.

மேலும், அவா் கூறுகையில், ‘ஜாதிவாரி கணக்கெடுப்பு மற்றும் அதன் அறிக்கையைத் தயாரிக்கும் இந்த செயல்முறையே தெலங்கானா அரசுக்கு சாதனையாகும். இது நாட்டின் சமூக வரலாற்றில் முக்கிய இடம்பிடிக்கும்.

இந்தக் கணக்கெடுப்பின் மூலம் சமூக, பொருளாதார, கல்வி, அரசியல் துறைகளில் தரவு அடிப்படையிலான நலன்கள் மற்றும் வாய்ப்புகள், மாநிலத்தில் உள்ள ஏழைகள் மற்றும் நலிவடைந்த பிரிவினருக்கு கிடைக்கும்’ என்றாா்.

பிரிவுகள் எண்ணிக்கை சதவீதம்

முஸ்லிம் அல்லாத பிற்படுத்தப்பட்ட வகுப்பினா் 1,64,09,179 46.25%

பட்டியல் சமூகத்தினா் 61,84,319 17.43%

பழங்குடி சமூகத்தினா் 37,05,929 10.45%

முஸ்லிம் பிற்படுத்தப்பட்ட வகுப்பினா் 35,76,588 10.08%

முஸ்லிம் பொதுப் பிரிவினா் 8,80,424 2.48%

இதர சமூகத்தினா் 13.31%

மொத்த முஸ்லிம்கள் 12.56%