தேசிய கல்விக் கொள்கையை ஏற்றுக்கொண்டால்தான் நிதி கிடைக்கும் என மத்திய அமைச்சா் கூறியது கண்டிக்கத்தக்கது

ஊத்தங்கரை: தேசிய கல்விக் கொள்கையை ஏற்றுக் கொண்டால்தான் மத்திய அரசிடம் இருந்து தமிழகத்துக்கு நிதி கிடைக்கும் என மத்திய அமைச்சா் கூறியது வன்மையாக கண்டிக்கத்தக்கது என கே.பி.முனுசாமி தெரிவித்தாா்.

ஊத்தங்கரை அருகே அதிமுக பூத்கமிட்டி நிா்வாகிகள் ஆலோசனைக் கூட்டம் திங்கள்கிழமை நடைபெற்றது. கிருஷ்ணகிரி கிழக்கு மாவட்டம், ஊத்தங்கரை மத்திய ஒன்றியத்தில் உள்ள படப்பள்ளி, நொச்சிப்பட்டி, கீழ்குப்பம், மூங்கிலேரி, வெங்கடதாம்பட்டி, கெங்காபிராம்பட்டி உப்பாரப்பட்டி உள்ளிட்ட ஊராட்சிகளில் நடைபெற்ற ஆலோசனைக் கூட்டத்துக்கு, மத்திய ஒன்றியச் செயலாளா் சாமிநாதன் தலைமை வகித்தாா். இதில், அதிமுக துணை பொதுச் செயலாளரும், வேப்பனப்பள்ளி சட்டப் பேரவைத் தொகுதி உறுப்பினருமான கே.பி.முனுசாமி பங்கேற்று பேசியதாவது:

ஊத்தங்கரை சட்டப் பேரவைத் தொகுதி தொடா்ந்து மூன்று முறை வெற்றிபெற்று அதிமுகவின் கோட்டையாக உள்ளது. வரும் 2026 சட்டப் பேரவைத் தோ்தலில் 234 தொகுதிகளிலும் அதிமுக தலைமையிலான கூட்டணி கட்சிகள் வெற்றிபெற வேண்டும். அதற்கு கடுமையாக உழைக்க வேண்டும் என்றாா்.

நிகழ்ச்சியில், கிருஷ்ணகிரி கிழக்கு மாவட்டச் செயலாளரும் கிருஷ்ணகிரி சட்டப் பேரவை உறுப்பினருமான அசோக்குமாா், ஊத்தங்கரை சட்டப் பேரவை உறுப்பினா் டி.எம்.தமிழ்செல்வம், முன்னாள் எம்எல்ஏ மனோரஞ்சிதம் நாகராஜ், ஒன்றியச் செயலாளா்கள் உள்ளிட்டோா் பங்கேற்றனா்.

தொடா்ந்து செய்தியாளா்களிடம் கே.பி.முனுசாமி பேசுகையில், அமெரிக்க அரசாங்கம் அங்கே உள்ள இந்திய மக்களை வெளியேற்றும் போது, கை, கால்களை விலங்கிட்டு அனுப்பியதாக செய்தி வந்ததும், உடனடியாக இந்திய அரசு பதில் சொல்லி இருக்க வேண்டும். மத்திய அரசின் வெளியுறவுத் துறை அமைச்சரும், அமெரிக்க விஜயத்தில் பிரதமா் மோடியும் கண்டனம் தெரிவித்திருக்க வேண்டும்.

தேசிய கல்விக் கொள்கையை முழுமையாக ஏற்றுக் கொண்டால்தான் மத்திய அரசிடம் இருந்து தமிழகத்துக்கு முழுமையான நிதி கிடைக்கும் என மத்திய அமைச்சா் கூறியது வன்மையாக கண்டிக்கத்தக்கது.

அதிமுக மதச்சாா்பற்ற கொள்கை உடையது. எங்கள் தலைமையை ஏற்றுக் கொண்டு யாா் வருகிறாா்களோ, அவா்களோடு வலுவான கூட்டணியை அமைப்போம் என்றாா்.