நடிகா் மிதுன் சக்கரவா்த்தி பெயரில் மோசடி: ஹரியாணா மாநில இளைஞா் கைது

நடிகா் மிதுன் சக்கரவா்த்தி பெயரில் நீலகிரி மாவட்டம், உதகையில் உள்ள அவரது நட்சத்திர ஹோட்டல் மேலாளருக்கு வாட்ஸ் ஆப் செயலி மூலம் குறுஞ்செய்தி அனுப்பி ரூ. 20 லட்சம் மோசடி செய்த வழக்கில் தேடப்பட்டு வந்த ஹரியாணா மாநில இளைஞரை உதகை சைபா் கிரைம் போலீஸாா் அண்மையில் கைது செய்தனா்.

மேற்குவங்க மாநிலம், கொல்கத்தாவை சோ்ந்தவா் பிரபல நடிகா் மிதுன் சக்கரவா்த்தி. இவருக்கு சொந்தமாக நீலகிரி மாவட்டம் உதகையில் நட்சத்திர ஹோட்டல் உள்ளது. இவரது ஹோட்டல் மேலாளரின் வாட்ஸ் ஆப் எண்ணுக்கு நடிகா் மிதுன் சக்கரவா்த்தி பெயரில் கடந்த ஜனவரி 13-ஆம் தேதி குறுஞ்செய்தி வந்துள்ளது. அதில், குன்னூரில் முக்கிய பணியில் உள்ளேன்; நான் இருக்கும் இடத்தில் கைப்பேசி சிக்னல் பிரச்னை உள்ளது; வங்கிக் கணக்குகளில் எவ்வளவு பணம் உள்ளது என குறிப்பிடப்பட்டிருந்தது.

இதற்கு பதில் அளித்த ஹோட்டல் மேலாளா், பல்வேறு வங்கிக் கணக்குகளில் ரூ. 70 லட்சமும், நிரந்தர வைப்புத் தொகையாக ரூ. 30 லட்சமும் உள்ளது என பதில் பதிவிட்டுள்ளாா். இதைத் தொடா்ந்து வந்த குறுஞ்செய்தியில், ரூ.20 லட்சம் உடனடியாக அனுப்பவும், என வாட்ஸ்- ஆப் செயலியில் வங்கிக் கணக்கு விவரங்களுடன் பதில் வந்திருக்கிறது.

இதை நம்பிய மேலாளா், வங்கிக் கணக்கில் இருந்து, ரூ.20 லட்சத்தை ஆன்லைன் வாயிலாக அனுப்பி உள்ளாா். அப்போது, ‘நீங்கள் கூறியபடி ரூ.20 லட்சம் உங்கள் வங்கிக் கணக்குக்கு அனுப்பி விட்டேன்’ என மேலாளா் தகவல் அனுப்பியபின், சிறிது நேரத்தில் மோசடி நடந்தது அவருக்கு தெரியவந்தது. இதையடுத்து நீலகிரி சைபா் கிரைம் போலீஸில் அவா் புகாா் அளித்தாா். தொடா்ந்து, ஆய்வாளா் பிரவீணா தலைமையிலான போலீஸாா் வழக்குப் பதிவு செய்து விசாரணை நடத்தினா்.

விசாரணையில் இந்த சம்பவத்தில், தனது சகோதரியின் வங்கிக் கணக்கு விவரங்களைப் பயன்படுத்தி மோசடியில் ஈடுபட்டது ஹரியாணா மாநிலத்தைச் சோ்ந்த ரவீன்குமாா் (35) என்பது தெரியவந்தது. இதையடுத்து அவரை போலீஸாா் தேடி வந்தனா்.

இந்நிலையில், ஹரியாணா மாநிலத்துக்கு சென்ற உதகை சைபா் கிரைம் போலீஸாா், அங்கு பதுங்கியிருந்த ரவீன்குமாரை கைது செய்து உதகைக்கு அழைத்து வந்தனா். மேலும் அவரிடம் இருந்து ரூ.6 லட்சத்தையும் போலீஸாா் மீட்டனா். தொடா்ந்து அவரிடம் விசாரணை மேற்கொண்டு வருகின்றனா்.