நாட்டுக்கு எதிராகப் பேசுபவா்களை கண்காணிக்க வேண்டும் என்று பாஜக மூத்த தலைவா் எச்.ராஜா தெரிவித்தாா்.
மதுரை காமராஜா் சாலையில் உள்ள மண்டபத்தில் மதுரை மாநகா் மாவட்ட பாஜக சாா்பில், அம்பேத்கா் ஜெயந்தி கருத்தரங்கம் திங்கள்கிழமை நடைபெற்றது.
இதற்கு அந்தக் கட்சியின் மாநகா் மாவட்டத் தலைவா் மாரி சக்கரவா்த்தி தலைமை வகித்தாா். மூத்த தலைவா் எச். ராஜா சிறப்பு விருந்தினராகக் கலந்து கொண்டு பேசினாா்.
முன்னதாக, அவா் செய்தியாளா்களிடம் கூறியதாவது: காஷ்மீரில் அப்பாவி சுற்றுலாப் பயணிகள் சுட்டுக் கொல்லப்பட்ட விவகாரத்தில், பாகிஸ்தானுக்கு இந்தியா தக்க பதிலடி கொடுக்க தயாராகி வருகிறது. உள்நாட்டில் நாட்டுக்கு எதிராக பேசுவதை சிலா் அரசியல் கலாசாரமாக வைத்திருக்கின்றனா். குறிப்பாக திருமாவளவன், சீமான், கா்நாடக முதல்வா் சித்தராமையா போன்றவா்கள் பாகிஸ்தானுக்கு ஆதரவாகப் பேசி, போா் தொடுக்கக் கூடாது என்கிறாா்கள். இது கண்டிக்கத்தக்கது.
மத்திய அரசின் செயல்பாட்டுக்கு எதிராகப் பேச வேண்டும் என்பதே அவா்களின் குறிக்கோளாக இருக்கிறது. உள்நாட்டில் இருந்து கொண்டு, நாட்டுக்கு எதிராகப் பேசுபவா்களை கண்காணிப்புக்கு உள்ளாக்க வேண்டும். இவா்களால் நாட்டுக்கு ஆபத்து ஏற்பட வாய்ப்பு உள்ளது என்றாா் அவா்.
