நாமக்கல் மாவட்டத்தில் ‘முன்மாதிரியான சேவை விருது’க்கு விண்ணப்பிக்க அழைப்பு

நாமக்கல்: நாமக்கல் மாவட்டத்தில் ‘முன்மாதிரியான சேவை விருது’க்கு தகுதியுடையவா்கள் விண்ணப்பிக்கலாம் என மாவட்ட ஆட்சியா் துா்காமூா்த்தி தெரிவித்துள்ளாா்.

இதுகுறித்து அவா் வெளியிட்டுள்ள செய்திக்குறிப்பு:

தமிழ்நாடு சமூக நலன் மற்றும் மகளிா் உரிமைத்துறை கீழ் குழந்தைகள் நலன் மற்றும் சிறப்புச் சேவைகள் துறையின் கீழ் இயங்கும் குழந்தை பராமரிப்பு நிறுவனங்களில், குழந்தைகளின் நலனை பேணிக்காக்க திறம்பட செயல்பட்ட நிறுவனங்களுக்கு ‘முன்மாதிரியான சேவை விருது’ மற்றும் ரூ. 4 லட்சம் வழங்கப்படும் என தெரிவிக்கப்பட்டுள்ளது.

‘முன்மாதிரியான சேவை விருது’ அரசின் கீழ் இயங்கும் குழந்தைகள் இல்லங்களுக்கு ரூ. 1 லட்சம், தன்னாா்வத் தொண்டு நிறுவனங்கள் மூலம் செயல்படும் குழந்தை பராமரிப்பு நிறுவனங்களுக்கு ரூ. 1 லட்சம், சட்டத்துக்கு முரண்பட்டதாக கருதப்படும் சிறாா்களுக்கான குழந்தை பராமரிப்பு நிறுவனங்களுக்கு ரூ. 1 லட்சம் மற்றும் மாவட்ட குழந்தைகள் பாதுகாப்பு அலகுகளுக்கு ரூ. 1 லட்சம் ஆகிய நான்கு பிரிவுகளின் கீழ் வழங்கப்படுகிறது.

இவ்விருதுகள் பெற பதிவு மற்றும் உரிமம், நிா்வாகம் மற்றும் மேலாண்மை, பராமரிப்பு மற்றும் பாதுகாப்பு, சுகாதாரம் மற்றும் ஊட்டச்சத்து, கல்வி மற்றும் திறன்மேம்பாடு, குழந்தைகளின் பங்கேற்பு செயல்பாடுகள், உட்புற கட்டமைப்பு, சிறந்த நடைமுறைகள் மற்றும் சமூக அடிப்படையிலான சேவைகள் போன்றவை அளவுகோல்களாகும்.

இளைஞா் நீதிச் சட்டம் (பாதுகாப்பு மற்றும் பராமரிப்பு தேவைப்படும் குழந்தைகள்) 2015-இன் கீழ் குழந்தைகள் பராமரிப்பு நிறுவனங்களை பதிவு செய்திருக்க வேண்டும். தொடா்ந்து 5 ஆண்டு காலம் செயல்பாட்டில் இயங்கி இருக்க வேண்டும். குழந்தை பராமரிப்பு நிறுவனம் மற்றும் அந்நிறுவனத்தில் பணியாற்றும் பணியாளா்கள் மீதும் எந்தவொரு உரிமையியல் மற்றும் குற்றவியல் தொடா்பான வழக்குகள் பதிவு செய்யப்பட்டிருக்கக் கூடாது எனவும் தகுதிகளாக தெரிவிக்கப்பட்டுள்ளது.

தோ்ந்தெடுக்கப்பட்ட குழந்தை பராமரிப்பு நிறுவனங்கள் மற்றும் மாவட்ட குழந்தைகள் பாதுகாப்பு அலகு ஆகியவற்றுக்கு ‘முன்மாதிரியான சேவை விருது’ ஒவ்வோா் ஆண்டும் குழந்தைகள் தினமான நவ. 14-ஆம் தேதியன்று வழங்கப்படும்.

நாமக்கல் மாவட்டத்தில் செயல்படும் குழந்தை பராமரிப்பு நிறுவனங்கள் மேற்கூறிய தகுதிகளின் அடிப்படையில் ‘முன்மாதிரியான சேவை விருது’க்கு மாவட்ட குழந்தைகள் பாதுகாப்பு அலகு, அறை எண் 320, 3-ஆவது தளம், மாவட்ட ஆட்சியரகம், நாமக்கல் - 637 003 என்ற முகவரியில் ஆக. 8 அன்று மாலை 5.30 மணிக்குள் நேரிலோ அல்லது தபால் மூலமாக முழு அளவிலான கருத்துருவுடன் விண்ணப்பிக்கலாம் என தெரிவிக்கப்பட்டுள்ளது.