மத்திய அரசு தாக்கல் செய்த நிதிநிலை அறிக்கையை கண்டித்து, மாா்க்சிஸ்ட் கம்யூனிஸ்ட் கட்சியின் சாா்பில் கண்டன ஆா்ப்பாட்டம் செவ்வாய்க்கிழமை நடைபெற்றது.
எலச்சிபாளையம் பேருந்து நிறுத்தத்தில் நடைபெற்ற கண்டன ஆா்ப்பாட்டத்தில், மத்திய அரசு தாக்கல் செய்த நிதிநிலை அறிக்கையில் 100 நாள் வேலைவாய்ப்பு திட்டத்துக்கு கூடுதல் நிதி ஒதுக்கவில்லை, விவசாய திட்டங்களுக்கு நிதி ஒதுக்கீடு செய்ததில் பாரபட்சம் உள்ளது. பொதுத்துறை நிறுவனத்தை தனியாருக்கு தாரை வாா்க்கும் விதமாக உள்ளது. ஏழை எளிய நடுத்தர மக்களை மிகவும் பாதிக்கும் வகையிலான நிதிநிலை அறிக்கையை பாஜக அரசு தாக்கல் செய்துள்ளதாக தெரிவித்தனா்.
ஆா்ப்பாட்டத்துக்கு ஒன்றியக் குழு உறுப்பினா் சக்திவேல் தலைமை வகித்தாா்.
மாவட்டச் செயலாளா் எஸ்.கந்தசாமி, மாவட்ட செயற்குழு உறுப்பினா்கள் எஸ்.தமிழ்மணி, சு.சுரேஷ், பழனி, முருகன் உள்ளிட்டோா் கலந்துகொண்டனா்.
