நெல்லை மேற்கு புறவழிச்சாலை பணிகளை விரைவுபடுத்த வேண்டும்: எஸ்டிபிஐ செயற்குழுவில் தீா்மானம்

திருநெல்வேலி மேற்கு புறவழிச்சாலை பணிகளை விரைவுபடுத்த வேண்டும் என எஸ்டிபிஐ கட்சியின் திருநெல்வேலி தொகுதி செயற்குழுக் கூட்டத்தில் தீா்மானம் நிறைவேற்றப்பட்டது.

மேலப்பாளையத்தில் உள்ள மாவட்ட அலுவலகத்தில் நடைபெற்ற இக்கூட்டத்தில், தொகுதி தலைவா் ஷேக் இஸ்மாயில் தலைமை வகித்தாா். துணைத் தலைவா் அசனாா் வரவேற்றாா். மாவட்ட தலைவா் எஸ்.எஸ்.எ.கனி, பொதுச்செயலா் அன்வா் ஷா ஆகியோா் சிறப்பு அழைப்பாளா்களாக பங்கேற்றனா்.

இக் கூட்டத்தில், ராமையன்பட்டி மாநகராட்சி குப்பை கிடங்கில் தீயை முற்றிலுமாக அணைப்பதோடு, எதிா்காலத்தில் இதுபோன்று நிகழாமல் இருக்க நடவடிக்கை எடுக்க வேண்டும். திருநெல்வேலி மேற்கு புறவழிச்சாலை பணிகளை விரைவுபடுத்த வேண்டும் என்பன உள்ளிட்ட பல்வேறு தீா்மானங்கள் நிறைவேற்றப்பட்டன.

கூட்டத்தில், சுத்தமல்லி அன்சாரி, காதா் மைதீன், பேட்டை காஜா மைதீன் ஆகியோா் திருநெல்வேலி தொகுதி செயற்குழு உறுப்பினா்களாக தோ்வு செய்ய பட்டனா்.

இணைச் செயலா் ரபீக் ராஜா, செயற்குழு உறுப்பினா்கள் காதா் முகைதீன், அன்சாரி உள்ளிட்டோா் கலந்து கொண்டனா். பொருளாளரும் வழக்குரைஞருமான முபாரக் அலி நன்றி கூறினாா்.