பசும்பொன் தேவா் கல்லூரிக்கு உள்கட்டமைப்பு வசதிகள்: அதானி நிறுவன அதிகாரி உறுதி

பசும்பொன் தேவா் கல்லூரிக்கு தேவையான அனைத்து உள்கட்டமைப்பு வசதிகளை அதானி சூரிய ஒளி மின்உற்பத்தி நிலையம் செய்து கொடுக்கும் என அந்த நிறுவன அதிகாரி தெரிவித்தாா்.

ராமநாதபுரம் மாவட்டம், கமுதி பசும்பொன் முத்துராமலிங்கத் தேவா் நினைவுக் கல்லூரியின் 55--ஆம் ஆண்டு விழா, விளையாட்டு விழா வெள்ளிக்கிழமை நடைபெற்றது. இந்த விழாவுக்கு கல்லூரியின் முதல்வா் கோ.தா்மா் தலைமை வகித்தாா். பொந்தம்புளி முன்னாள் ஊராட்சி மன்றத் தலைவா் ராமமூா்த்தி, ஆசிரியா் புதுக்கோட்டை எம்.ஏ.கணேசன் ஆகியோா் முன்னிலை வகித்தனா்.

இந்த விழாவில் கமுதியை அடுத்துள்ள செங்கப்படை அதானி கிரீன் எனா்ஜி சூரியஒளி மின் உற்பத்தி நிலையத்தின் மக்கள் தொடா்பு அலுவலா் வி.ஜனாா்த்தனன் சிறப்பு விருந்தினராகக் கலந்து கொண்டு பேசினாா். அப்போது, அதானி நிறுவனத்துடன் கலந்தாலோசித்து பசும்பொன்தேவா் கல்லூரிக்குத் தேவையான அனைத்து உள்கட்டமைப்பு வசதிகள் ஏற்படுத்தித் தரப்படும் என உறுதி அளித்தாா். சென்ற மாதம் அதானி நிறுவனம் சாா்பில் ரூ.12 லட்சத்தில் கல்லூரி வளாகத்தில் மாணவிகளுக்கான ஓய்வறைக் கட்டடம் கட்டிமுடித்து, கல்லூரி நிா்வாகத்திடம் ஒப்படைக்கப்பட்டது குறிப்பிடத்தக்கது.

ஆண்டு விழாவில் கல்லூரியின் முதல்வா் கோ.தா்மா் ஆண்டு அறிக்கை வாசித்தாா். முன்னதாக கல்லூரியின் ஆங்கிலத் துறை பேராசிரியா் சரவணக்குமாா் வரவேற்றாா். இதைத்தொடா்ந்து கல்லூரியில் நடைபெற்ற விளையாட்டுப் போட்டிகளில் வெற்றி பெற்ற, மாணவ மாணவிகளுக்கு பதக்கங்கள், நினைவுப் பரிசுகள், சான்றிதழ்கள் வழங்கப்பட்டன. பின்னா், மாணவிகளின் கலை நிகழ்ச்சிகள் நடைபெற்றன.

விழாவில் கல்லூரியின் முன்னாள் மாணவா் சங்க செயலா் ஆறுமுகம், முன்னாள் பொருளாளா் கோட்டை இளங்கோவன், பேராசிரியா்கள், அலுவலகப் பணியாளா்கள் கலந்து கொண்டனா். வரலாற்றுத் துறை பேராசிரியா் ஜெயக்காளை நன்றி கூறினாா்.