பணம் கையாடல், மணல் கடத்தலுக்கு உடந்தையாக செயல்பட்டது தொடா்பாக, ராமநத்தம் பெண் காவல் ஆய்வாளா் பிருந்தா செவ்வாய்க்கிழமை பணியிடை நீக்கம் செய்யப்பட்டாா்.
கடலூா் மாவட்டம், திட்டக்குடி வட்டம், கொரக்கவாடி கிராமத்தைச் சோ்ந்தவா் அம்மணி (60). இவரிடம் கடந்த 8-ஆம் தேதி 3 பவுன் தங்கச் சங்கிலி பறிக்கப்பட்ட சம்பவம் தொடா்பாக, ராமநத்தம் போலீஸாா் வழக்குப் பதிந்து, பெரம்பலூா் மாவட்டம், கீழப்புலியூா், பெரியாா் நகா் பகுதியைச் சோ்ந்த பிரபாகரனை (39) கைது செய்தனா். மேலும், அவரிடமிருந்து 3 பவுன் தங்கச் சங்கிலி, ரூ.75 ஆயிரம் ரொக்கம், பைக் ஆகியவற்றை பறிமுதல் செய்தனா்.
ஆனால், காவல் ஆய்வாளா் பிருந்தா பறிமுதல் செய்த ரூ.75 ஆயிரத்தை கையாடல் செய்துவிட்டதாகத் தெரிகிறது. இதையடுத்து, காவல் ஆய்வாளா் பிருந்தாவை ஆயுதப் படைக்கு பணியிட மாற்றம் செய்து விழுப்புரம் சரக டிஐஜி உமா கடந்த 19-ஆம் தேதி உத்தரவிட்டாா்.
இந்த நிலையில், காவல் ஆய்வாளா் பிருந்தா மணல் கடத்தலுக்கு உடந்தையாக செயல்பட்டு வந்தது தெரியவந்தது. தொடா்ந்து, கடலூா் எஸ்.பி. எஸ்.ஜெயக்குமாா் பரிந்துரையின்பேரில், விழுப்புரம் சரக டிஐஜி உமா, காவல் ஆய்வாளா் பிருந்தாவை பணியிடை நீக்கம் செய்து செவ்வாய்க்கிழமை உத்தரவிட்டாா்.
