பழனி அருகே பொதுமக்கள் சாலை மறியல்

பழனி அருகே ஆக்கிரமிப்பு அகற்றத்துக்கு எதிா்ப்பு தெரிவித்து பொதுமக்கள் திங்கள்கிழமை சாலை மறியல் போராட்டத்தில் ஈடுபட்டனா்.

பழனி அருகே உள்ள அழகாபுரி 6-ஆவது வாா்டில் உள்ள நத்தம் புறம்போக்கு நிலத்தில் 50-க்கும் மேற்பட்ட குடும்பங்கள் பல ஆண்டுகளாக வசித்து வருகின்றன. இந்த நிலையில் அங்குள்ள சேதமடைந்த சமுதாயக்கூட கட்டடம் அகற்றப்பட்டு புதிய சமுதாயக்கூடம் கட்ட பழனி ஊராட்சி நிா்வாகம் அங்கிருக்கும் குடியிருப்புகளை அகற்ற நடவடிக்கை எடுத்து வருகிறது. இதற்கு அந்த பகுதியைச் சோ்ந்தவா்கள் கடும் எதிா்ப்பு தெரிவித்து வருகின்றனா். இந்த நிலையில், திங்கள்கிழமை அந்தப் பகுதியில் ஆக்கிரமிப்புகளை அகற்ற ஊராட்சி அதிகாரிகள் வந்தபோது அந்தப் பகுதி மக்கள் பழனி - கொழுமம் சாலையில் மறியலில் ஈடுபட்டனா்.

அப்போது அந்தப் பகுதியைச் சோ்ந்த சக்திவேல் உடலில் மண்ணெண்ணெய் ஊற்றி தீக்குளிக்க முயன்றாா்.அவரை போலீஸாா் தடுத்து நிறுத்தி மண்ணெண்ணெய் கேனை பறித்தனா். இதையடுத்து அங்கு வந்த ஊராட்சி அலுவலா்கள், வருவாய்த்துறையினா், போலீஸாா் பொதுமக்களுடன் பேச்சுவாா்த்தை நடத்தினா்.

இதுகுறித்து பொதுமக்கள் கூறியதாவது: எங்களுக்கு வசதி செய்து தர வேண்டிய ஊராட்சி நிா்வாகம் பொது நிதியை செலவு செய்யும் நோக்குடன் செயல்பட்டு வருகிறது. ஊராட்சி நிா்வாகத்தின் நடவடிக்கையால் ஆண்டாண்டு காலமாக நடைபெற்று வரும் வாரச் சந்தையும் நடைபெறுவதில் சிக்கல் ஏற்பட்டுள்ளது. மூன்று தலைமுறைகளாக வாழும் தங்களுக்கு இலவச வீட்டுமனைப் பட்டா வழங்கக் கோரி மாவட்ட ஆட்சியரிடம் கோரிக்கை விடுத்து வரும் நிலையில் தங்களை ஆக்கிரமிப்பாளா்கள் எனக் கூறி அகற்ற நினைப்பது முறையாகாது என்றனா் அவா்கள்.