பாரூா் அருகே அரசு தொடக்கப் பள்ளிக்கு மாணவா்கள் சென்றுவர பாதை வசதி கோரி பொதுமக்கள் தா்னாவில் ஈடுபட்டனா்.
கிருஷ்ணகிரி மாவட்டம், பாரூா் அருகே உள்ள செல்லக்குட்டப்பட்டி ஊராட்சிக்கு உள்பட்ட காட்டுகொல்லை கிராமத்தில் 90 குடும்பங்கள் வசிக்கின்றனா். அப் பகுதியைச் சோ்ந்த 24 மாணவா்கள் அங்குள்ள அரசு தொடக்கப் பள்ளியில் கல்வி பயின்று வருகின்றனா்.
இந்த பள்ளிக்கு மாணவ, மாணவிகள் சென்றுவர பாதை இல்லாத நிலையில், தனியாா் பட்டா நிலத்தை பயன்படுத்தி வந்தனா். இந்த நிலையில், பட்டா நிலத்தின் உரிமையாளா் தனது நிலத்தில் கம்பி வேலி அமைத்ததால், பள்ளிக்கு சென்றுவர வழி இல்லாததால் மாணவ, மாணவிகள் அவதிப்பட்டனா்.
இந்த நிலையில் பொதுமக்கள், அரசு அலுவலா்களின் வேண்டுகோளை ஏற்று பட்டா நிலத்தின் உரிமையாளா் பள்ளி மாணவ, மாணவிகளின் நலன் கருதி 3 அடி அகலத்துக்கு சுமாா் 150 அடிக்கு பாதை வழங்க ஒப்புக்கொண்டாா்.
ஆனால், அவா் வழங்கிய நிலம் பாதை வசதிக்கு போதுமானதாக இல்லை எனக் கூறி கிராம மக்கள், பள்ளி வளாகத்தில் அமா்ந்து வியாழக்கிழமை தா்னாவில் ஈடுபட்டனா். வருவாய்த் துறையினா், போலீஸாா் நடத்திய பேச்சுவாா்த்தையடுத்து தா்னாவில் ஈடுபட்டவா்கள் கலைந்து சென்றனா்.
