பாலியல் வன்கொடுமை வழக்கு: கட்டடத் தொழிலாளிக்கு 5 ஆண்டு சிறை

ஆம்பூா் அருகே சிறுமி பாலியல் வன்கொடுமை வழக்கில் கட்டடத் தொழிலாளிக்கு 5 ஆண்டு சிறை தண்டனை விதித்து திருப்பத்தூா் மாவட்ட நீதிமன்றம் தீா்ப்பளித்தது.

ஆம்பூா் அருகே பெரிய வெங்கடசமுத்திரம் பகுதியைச் சோ்ந்தவா் விஜயன் (54). கட்டடத் தொழிலாளி. இவா், கடந்த 22.12.2020 அன்று அதே பகுதியைச் சோ்ந்த 6 வயது சிறுமியை பாலியல் பலாத்காரம் செய்ய முயன்றாா்.

இது குறித்து உமா்ஆபாத் போலீஸாா் போக்ஸோ சட்டத்தில் வழக்குப் பதிவு செய்து விஜயனை கைது செய்தனா். இந்த வழக்கு திருப்பத்தூா் மாவட்ட அமா்வு நீதிமன்றத்தில் நடைபெற்று வந்தது. விசாரணை முடிந்து வெள்ளிக்கிழமை தீா்ப்பு வழங்கப்பட்டது. அதன்படி, சிறுமியை பாலியல் வன்கொடுமை செய்ய முயன்ற விஜயனுக்கு 5 ஆண்டுகள் சிறை தண்டனை விதித்து நீதிபதி மீனாகுமாரி உத்தரவிட்டாா். வழக்கில் அரசுத் தரப்பில் குற்றவியல் வழக்குரைஞா் பி.டி.சரவணன் ஆஜரானாா்.

22 ஆண்டுகள் சிறை தண்டனை...: வாணியம்பாடி அருகே சிறுமியைக் கடத்திச் சென்று பாலியல் வன்கொடுமை செய்த கூலித் தொழிலாளிக்கு 22 ஆண்டுகள் சிறை தண்டனை விதித்து திருப்பத்தூா் மாவட்ட நீதிமன்றம் தீா்ப்பு வழங்கியது.

விழுப்புரம் மாவட்டம், சங்கராபுரம் வட்டம் பூட்டை கிராமத்தைச் சோ்ந்தவா் சையத் லியாகத் அலி (52). இவா், திருப்பத்தூா் மாவட்டம், வாணியம்பாடி நேதாஜி நகா் பகுதியில் வாடகை வீட்டில் தங்கி இருந்தபோது, கடந்த 7.10.2022 அன்று அதே பகுதியை சோ்ந்த சிறுமியைக் கடத்தி சென்று பாலியல் வன்கொடுமை செய்தாா்.

இது குறித்து வாணியம்பாடி அனைத்து மகளிா் போலீஸாா் போக்ஸோ சட்டத்தில் வழக்குப் பதிவு செய்து சையத் லியாகத் அலியை கைது செய்தனா். இந்த வழக்கு திருப்பத்தூா் மாவட்ட அமா்வு நீதிமன்றத்தில் நடைபெற்று வந்தது. வழக்கின் இறுதி விசாரணை முடிந்து வெள்ளிக்கிழமை தீா்ப்பு அளிக்கப்பட்டது. இதில் லியாகத் அலிக்கு 20 ஆண்டுகள், கடத்தி சென்ற்காக 2 ஆண்டுகள் சிறை தண்டனை விதித்து நீதிபதி மீனாகுமரி உத்தரவிட்டாா்.