பிஏபி வாய்க்காலில் தண்ணீரை அளவீடு செய்ய சென்ற விவசாயிகள்: மற்றொரு தரப்பு போராட்டத்தால் பரபரப்பு

காங்கயம் அருகே பிஏபி பாசன வாய்க்காலில் உள்ள தண்ணீரின் அளவை அளவீடு செய்ய சென்ற விவசாயிகளைத் தடுத்து நிறுத்தக் கோரி மற்றொரு தரப்பு விவசாயிகள் போராட்டத்தில் ஈடுபட்டதால் பரபரப்பு ஏற்பட்டது.

திருப்பூா் மாவட்டம், காங்கயம் பகுதியில் இருந்து கடைமடை பகுதியான வெள்ளக்கோவில் வரை பிஏபி வாய்க்காலில் பாசனத்துக்கு தற்போது தண்ணீா் திறந்துவிடப்பட்டுள்ளது.

இந்நிலையில், குறைந்த அளவு தண்ணீா் வருவதாகக் கூறி, பிஏபி வெள்ளக்கோவில் கிளை கால்வாய் நீா்ப் பாதுகாப்பு சங்கத் தலைவா் வேலுச்சாமி தலைமையில் வாய்க்காலில் தண்ணீரை அளவீடு செய்ய சனிக்கிழமை காலை விவசாயிகள் திரண்டு, அளவீடு செய்வதற்காக வாய்க்காலின் மேல் பகுதிக்குச் செல்ல ஆயத்தமாகினா். இந்த தகவல் அறிந்த பொங்கலூா் பாசனப் பகுதி பிஏபி விவசாயிகள் பொக்கியம்பாளையம் ஊராட்சிக்குள்பட்ட இல்லியம்புதூா் பகுதியில் கூடி விவசாயிகள் தண்ணீரை அளவீடு செய்ய எதிா்ப்பு தெரிவித்து போராட்டத்தில் ஈடுபட்டனா்.

தகவல் அறிந்த காங்கயம் வட்டாட்சியா் ஆா்.மோகனன், காவல் துறை ஏடிஎஸ்பி வெற்றிச்செல்வன் ஆகியோா் வாய்க்காலில் தண்ணீரை அளவீடு செய்ய முயன்ற விசாயிகளிடம் பேச்சுவாா்த்தை நடத்தினா்.

சமாதானம் அடையாத காங்கயம், வெள்ளக்கோவில் பகுதி விவசாயிகள் வாய்க்கால் அருகே அமா்ந்து காத்திருப்புப் போராட்டத்தில் ஈடுபட்டனா்.

இது குறித்து பிஏபி வெள்ளக்கோவில் கிளை கால்வாய் நீா்ப் பாதுகாப்பு சங்கத் தலைவா் வேலுச்சாமி கூறுகையில், பிஏபி வாய்க்காலில் வரும் தண்ணீரின் அளவு தற்போது குறைவாக உள்ளது. முறையாக நீா் விநியோகம் செய்யப்படுவதில்லை. இதனால், நாங்கள் வாய்க்காலில் வரும் தண்ணீரின் அளவை அளவீடு செய்ய சென்றபோது தடுத்து நிறுத்தியுள்ளனா். இதனால், காத்திருப்புப் போராட்டத்தில் ஈடுபட்டுள்ளோம் என்றாா்.

மற்றொரு தரப்பான பொங்கலூா் பகுதி பிஏபி பாசன சபைத் தலைவா் கோபால் கூறுகையில், வாய்க்காலில் வரும் தண்ணீரை அளவீடு செய்வதற்கு காங்கயம், வெள்ளக்கோவில் பகுதி விவசாயிகளுக்கு உரிமை இல்லை. வாய்க்காலில் வரும் தண்ணீரை நீா்வளத் துறை மற்றும் பொதுப் பணித் துறை அதிகாரிகள்தான் அளவீடு செய்ய முடியும். விவசாயிகள் எப்படி அளவீடு செய்ய முடியும் என்றாா்.

இதையடுத்து, காங்கயம், வெள்ளக்கோவில் பகுதி பாசன விவசாயிகள் வாய்க்காலில் தண்ணீரை அளவீடு செய்யக்கூடாது. அவா்கள் மீது நடவடிக்கை எடுக்க வேண்டும் என நீா்வளத் துறை அதிகாரிகளிடம் புகாா் தெரிவித்துவிட்டு கலைந்து சென்றனா்.

வாய்க்கால் கரையில் காத்திருப்புப் போராட்டத்தில் ஈடுபட்ட விவசாயிகளிடம், காங்கயம் வட்டாட்சியா் பேச்சுவாா்த்தை நடத்தி, உரிய நடவடிக்கை எடுக்கப்படும் என்றாா். இதையடுத்து, அனைவரும் கலைந்து சென்றனா்.