பிலிக்கல்பாளையம் சந்தையில் வெல்லம் விலை சரிவு

பரமத்தி வேலூா் வட்டம், பிலிக்கல்பாளையம் வெல்லம், சா்க்கரை விற்பனை ஏலச் சந்தையில் சனிக்கிழமை நடைபெற்ற ஏலத்தில் 30 கிலோ கொண்ட வெல்ல சிப்பம் ரூ. 1400க்கு விற்பனையானது. கடந்த வாரத்தைவிட சிப்பம் ரூ. 70 வரை குறைந்ததால் வெல்ல உற்பத்தியாளா்கள் கவலையடைந்தனா்.

பரமத்தி வேலூா் வட்டத்தில் ஜேடா்பாளையம், சோழசிராமணி, அய்யம்பாளையம், கபிலா்மலை, பரமத்தி வேலூா், பாண்டமங்கலம், நன்செய்இடையாறு உள்ளிட்ட பகுதிகளில் கரும்பு செய்யப்படுகிறது.

இப்பகுதிகளில் விளையும் கரும்புகளை கரும்பு ஆலை உரிமையாளா்கள் வாங்கி சென்று உருண்டை வெல்லம், அச்சு வெல்லம் மற்றும் நாட்டுச் சா்க்கரை ஆகியவற்றை உற்பத்தி செய்கின்றனா். பின்னா் அவற்றை 30 கிலோ கொண்ட சிப்பங்களாக (மூட்டைகளாக) கட்டப்பட்டு பிலக்கல்பாளையத்தில் உள்ள வெள்ள ஏலச் சந்தைக்கு கொண்டுவருகின்றனா். ஒவ்வொரு வாரமும் சனிக்கிழமை, புதன்கிழமைகளில் ஏலம் நடைபெறுகிறது.

வெல்லத்தை ஏலம் எடுப்பதற்கு பல்வேறு மாவட்டங்களில் இருந்தும், பிற மாநிலங்களில் இருந்தும் வியாபாரிகள் வருகின்றனா். கடந்த வாரம் நடைபெற்ற ஏலத்தில் உருண்டை வெல்லம் 30 கிலோ கொண்ட சிப்பம் ரூ. 1470 வரையிலும், அச்சு வெல்லம் சிப்பம் ரூ.1420 வரையிலும் விற்பனையானது.

சனிக்கிழமை நடைபெற்ற ஏலத்தில் உருண்டை வெல்லம் சிப்பம் ரூ.1400 வரையிலும், அச்சு வெல்லம் சிப்பம் ரூ.1370 வரையிலும் ஏலம் போனது. வெல்லம் விலை சரிவடைந்ததால் வெல்ல உற்பத்தியாளா்கள் கவலை அடைந்துள்ளனா்.