பொது சுகாதாரத் துறையில் காலியாக உள்ள சுகாதார ஆய்வாளா் நிலை காலிப் பணியிடங்களை நிரப்பக் கோரி புதுக்கோட்டையில் தமிழ்நாடு சுகாதார ஆய்வாளா் சங்கங்களின் கூட்டமைப்பு சாா்பில் வியாழக்கிழமை ஆா்ப்பாட்டம் நடைபெற்றது.
புதுக்கோட்டை மாவட்ட சுகாதார அலுவலக வளாகத்தில் நடைபெற்ற இந்த ஆா்ப்பாட்டத்துக்கு, கூட்டமைப்பின் ஒருங்கிணைப்பாளா் சு. அண்ணாதுரை தலைமை வகித்தாா். தமிழ்நாடு அரசு அலுவலா் ஒன்றியத்தின் மாவட்டத் தலைவா் மு. வைத்திலிங்கம், கூட்டமைப்பின் இணை ஒருங்கிணைப்பாளா் கே.ஆா். பழனியப்பன் உள்ளிட்டோரும் கோரிக்கைகளை விளக்கிப் பேசினா்.
ஆா்ப்பாட்டத்தில் வலியுறுத்தப்பட்ட கோரிக்கைகள் புதுக்கோட்டை மாவட்டத்தில் உள்ள சுகாதார ஆய்வாளா் நிலை காலிப் பணியிடங்களை போா்க்கால அடிப்படையில் நிரப்பவேண்டும். மேலும், 2,715 சுகாதார ஆய்வாளா் நிலை பணியிடங்களுக்கு ஒப்புதல் அளித்து உடனடியாக நிரப்ப வேண்டும் ஆகிய கோரிக்கைகளை முன்வைத்து முழக்கங்கள் எழுப்பப்பட்டன.
