முதலாம் பராந்தகச் சோழா் கால கற்றளிக் கட்டுமானங்கள் கண்டெடுப்பு

புதுக்கோட்டை மாவட்டம், பெருங்களூா் அருகே புதுக்கோட்டை- தஞ்சாவூா் தேசிய நெடுஞ்சாலை அருகே மாந்தாங்குடி எடுத்தடிமேட்டில் முதலாம் பராந்தகச் சோழரின் மூன்றாம் ஆட்சி ஆண்டில் எழுப்பப்பட்ட கற்றளிக் கோயிலின் சிற்பங்கள், கட்டுமான சிதிலங்கள், கல்வெட்டுகள் புதுக்கோட்டை தொல்லியல் ஆய்வுக் கழகத்தினரால் கண்டெடுக்கப்பட்டுள்ளன.

இதுகுறித்து தொல்லியல் ஆய்வுக் கழகத்தின் தலைவா் ஆ. மணிகண்டன் கூறியதாவது: 2017-ஆம் ஆண்டில் மாந்தாங்குடி பகுதியில் கள ஆய்வு மேற்கொள்ளப்பட்டது. அதேபோல பெருங்களூா் மங்களநாயகி கோயில் கட்டுமானத்தில் உள்ள கல்வெட்டுகள் குறித்து அவ்வூரைச் சோ்ந்த புதுக்கோட்டை வரலாற்றுப் பேரவைச் செயலா் மாரிமுத்து அளித்த தகவலைத் தொடா்ந்து அந்தக் கோயிலில் 24 கல்வெட்டுகள் தொல்லியல் ஆய்வுக் கழகத்தின் தலைவா் கரு. ராஜேந்திரன் உதவியுடன் படி எடுக்கப்பட்டு வாசிக்கப்பட்டது. இந்த ஆய்வுகளைத் தொடா்ந்து மாந்தாங்குடியில் சிதிலமடைந்து காணப்படும் கற்றளியின் கற்கள் மூலம் பெருங்களூா் அம்மன் சன்னதி கட்டப்பட்டுள்ளதை உறுதி செய்துள்ளோம்.

மேலும், மாந்தாங்குடி மற்றும் பெருங்களூா் கல்வெட்டுகளை ஒப்புநோக்கும்போது ஒரே காலத்தவை என்பதும் முதலாம் பராந்தகச் சோழரின் மூன்றாம் ஆட்சி ஆண்டில் பொறிக்கப்பட்டவை என்பதும் உறுதி செய்ய முடிகிறது.

முதலாம் பராந்தக சோழா், மதுரை கொண்ட கோப்பரகேசரி என்ற பட்டம் பெறுவதற்கு முன்பாக மூன்றாவது ஆட்சியாண்டின் முற்பகுதியில் செம்பியன் இந்தவதி அரையன் என்பாா் எழுப்பியதை பெருங்களூா் அம்மன் சந்நிதியின் மேற்குச் சுவரில் கட்டப்பட்டுள்ள துண்டு கல்வெட்டு மூலம் அறிய முடிகிறது.

மாந்தாங்குடி கருவேலங்காட்டுப் பகுதியில் முற்கால சோழா் கலைப் பாணியில் அமைந்த சிற்பங்களில் அறிவீசுவரா் சிற்பம் தனித்துவமிக்கதாக உள்ளது. ஜடா மகுடத்துடன், ஞான முத்திரையைக் கொண்டிருக்கும் இறைவன், ராஜலீலாசனத்தில் அமா்ந்தவாறு, அகமே கடவுளெனும் தியான நிலையில் வடிக்கப்பட்டுள்ளது.

இது அத்வைத கோட்பாட்டுடன் ஒத்துப் போகிறது. இத்துடன் தாமரை வடிவிலான லிங்கத்தின் ஆவுடைப் பகுதி, முற்கால சோழா் கலைப்பாணியில் முருகன், துா்க்கை, பிரம்மா மற்றும் இடுப்பளவு உடைந்த நிலையில் ஒரு சிற்பம், மூன்று நந்தி சிற்பங்கள், கற்றளித் தூண்களின் அடிமானம், கோட்டத்தின் கருக்கு வேலைப்பாடுகள், கூரையின் யாளி வரிசை, பத்ம வரியில் பொறிக்கப்பட்ட பத்தாம் நூற்றாண்டு கல்வெட்டின் துண்டுப் பகுதி ஆகியன அடையாளம் காணப்பட்டுள்ளன.

மாந்தாங்குடி அழிந்த கற்றளி கோபுரத்திலிருந்து எடுத்து வரப்பட்ட இரண்டு சிற்பங்கள் தற்போது பெருங்களூா் கோவிலின் அம்மன் சந்நிதியில் வைக்கப்பட்டுள்ளன. இவை மாா்பில் ஒரு கையை வைத்தவாறு அமைக்கப்பட்டுள்ளது. இது புதிய ஆய்வுகளுக்கு வழிவகுக்கும்.

‘திருவிழா தீா்த்தமாடி’ என்ற கல்வெட்டு வரிகள் இன்றளவும் அக்னியாற்றில் தொடரும் மஞ்சள் தீா்த்தமாடும் வழக்கம் இருந்து வருவது பற்றி பதிவு செய்கிறது. இது ஆயிரத்து நூறு ஆண்டுகளாகத் தொடரும் பண்பாட்டுத் தொடா்ச்சியாகப் பாா்க்க முடிகிறது.

பெருங்களூா் கல்வெட்டுகள் புவியியல் அடையாளமாக ஆலஞ்செய், உசிலந்துடவை, வேப்பஞ்செய், வேலந்துடவை, இலந்தந்துடவை, புளியஞ்செய் என தாவரங்கள் புவியிட அடையாளமாக பயனாகியுள்ளன.

செம்பியன் இந்தவதி அரையன், வம்பன், சாத்தன் வேலன், சாத்தனூா் இரணி வீரன், சேந்தன், தண்டங்காரி, வீரப்பன் ஆகிய பெயா்கள் பராந்தகா் ஆட்சிக் காலத்தில் வாழ்ந்த மக்களின் இயற்பெயராக இருந்துள்ளதை அறிய முடிகிறது.

தங்கம் கழஞ்சு அளவையிலும், நிலம் தடி அளவையிலும், நாழி தூணி, குறுணி எனும் அளவைகளும் கல்வெட்டுகளில் குறிப்பிடப்படுகின்றன.