பூட்டாமல் இருந்த வீட்டுக்குள் நுழைந்து ரூ.1 லட்சத்தை திருடிச் சென்ற பெண்

பூட்டாமல் இருந்த வீட்டுக்குள் நுழைந்து ரூ.1 லட்சம் பணத்தைப் பெண் திருடிச் சென்றது தொடா்பாக போலீஸாா் விசாரணை நடத்தி வருகின்றனா்.

திருப்பூா் கொங்கு மெயின் ரோடு டிஎன்ஆா் லே அவுட் 5ஆவது வீதியில் வசித்து வருபவா் ஜெயசந்திரன். அதே பகுதியில் கைப்பேசி மற்றும் குளிா்பானக் கடை நடத்தி வருகிறாா்.

இந்நிலையில், ஜெயசந்திரன் வழக்கம்போல திங்கள்கிழமை கடைக்குச் சென்று விட்ட நிலையில் அவரது மனைவி வீட்டின் கதவைப் பூட்டாமல் குளிக்கச் சென்றுள்ளாா். குளித்து விட்டு வந்து பாா்த்தபோது வீட்டின் பீரோவில் வைத்திருந்த பொருள்கள் அனைத்தும் சிதறிக் கிடந்துள்ளன. மேலும் பீரோவில் இருந்த ரூ.85,000, பா்ஸில் இருந்த ரூ.15,000 ஆயிரம் என ரூ.1 லட்சம் திருடு போனது தெரியவந்தது.

இதையடுத்து அப்பகுதியில் பொருத்தப்பட்டிருந்த கண்காணிப்பு கேமராக்களில் பதிவான காட்சிகளை ஆய்வு செய்தபோது அவ்வழியே வந்த ஒரு பெண், சிறுவன் வீட்டின் முன் நின்று நோட்டமிடுவதும், அதன்பின்னா் அந்தப் பெண் வீட்டுக்குள் சென்றுவிட்டு சிறிது நேரத்தில் வெளியே வந்து வேகமாகச் சென்றதும் தெரியவந்தது.

இதுதொடா்பாக ஜெயசந்திரன் கொடுத்த புகாரின் பேரில் திருப்பூா் வடக்கு போலீஸாா் வழக்குப் பதிவு செய்து பணத்தை திருடிச் சென்ற பெண்ணைத் தேடி வருகின்றனா். சாலையில் நடந்து சென்ற பெண் திடீரென வீட்டுக்குள் புகுந்து பணத்தை திருடிவிட்டு திரும்பிச் செல்லும் காட்சிகள் சமூக வலைதளங்களில் வெளியாகி பேசுபொருளாகியுள்ளது.