சிறப்பு உதவி ஆய்வாளா் வெட்டிக் கொலை: என்கவுன்டரில் மணிகண்டன் பலி
பெருநகர சென்னை மாநகராட்சி தூய்மைப் பணியாளா்களுடனான, தமிழக அமைச்சா்களின் பேச்சு முடிவு எட்டப்படாததால், 6-ஆவது நாளாக புதன்கிழமையும் முற்றுகைப் போராட்டம் நீடித்தது.
சென்னை மாநகராட்சியின் பெரும்பாலான மண்டலங்களில் தூய்மைப் பணி தனியாா் நிறுவனம் மூலமாக மேற்கொள்ளப்படுகிறது. இந்த நிலையில், ராயபுரம், திரு.வி.க.நகா் மண்டலங்களின் தூய்மைப் பணியையும் தனியாருக்கு அளிக்க மாநகராட்சி முடிவெடுத்துள்ளது.
இதை எதிா்த்து, அந்த மண்டலங்களின் தூய்மைப் பணியாளா்கள் கடந்த 1 -ஆம் தேதி முதல் மாநகராட்சி ரிப்பன் மாளிகையை முற்றுகையிட்டு போராட்டத்தில் ஈடுபட்டு வருகின்றனா். பணி உறுதி பாதுகாப்பு மற்றும் ஊதியம் உள்ளிட்டவற்றை சுட்டிக்காட்டி உழைப்போா் உரிமை இயக்கம் சாா்பில் இந்தப் போராட்டம் நடைபெற்று வருகிறது.
போராட்டம் காரணமாக, ராயபுரம், திரு.வி.க. நகா் மண்டலங்களில் குப்பைகள் அகற்றும் பணி பாதிக்கப்பட்டுள்ளது. தெருக்களில் குப்பைகள் குவிந்து கிடப்பதாகப் புகாா் எழுந்துள்ளது.
இதையடுத்து போராட்டத்தைக் கைவிட்டு தூய்மைப் பணியாளா்கள் பணிக்குத் திரும்ப மேயா் ஆா்.பிரியா வலியுறுத்தினாா். தூய்மைப் பணியாளா்களின் கோரிக்கைகள் மீது நடவடிக்கை எடுக்கப்படும் எனவும் அவா் உறுதி அளித்தாாா்.
இருப்பினும் 6-ஆவது நாளாக புதன்கிழமையும் போராட்டம் தொடா்ந்தது.
அமைச்சா்கள் பேச்சு: இந்த நிலையில், சென்னை மாநகராட்சி ரிப்பன் மாளிகையில் அமைச்சா்கள் கே.என்.நேரு, பி.கே.சேகா்பாபு மற்றும் மாநகராட்சி ஆணையா் ஜெ.குமரகுருபரன் ஆகியோா் போராட்டத்தில் ஈடுபட்டுவரும் உழைப்பவா் உரிமை இயக்க நிா்வாகிகள் குமாரசாமி, மோகன் உள்ளிட்டோருடன் பேச்சு நடத்தினா். அப்போது, பணிப் பாதுகாப்பு உறுதி செய்யப்படும். ஊதியம் குறித்து தனியாா் நிறுவனத்துடன் பேசி முடிவெடுக்கப்படும் என அரசு தரப்பில் உறுதியளிக்கப்பட்டது.
ஆனால், பணி நிரந்தரம் உள்ளிட்ட கோரிக்கைகளை உழைப்பவா் உரிமை இயக்கத்தினா் வலியுறுத்தினா். அதனால், தீா்வு எட்டப்படாமலே கூட்டம் முடிந்தது. இதனையடுத்து போராட்டத்தைத் தொடருவதாக, போராட்டக் குழுவினா் அறிவித்தனா்.
