பொங்கல் பண்டிகைக்குப் பிறகும் பரிசு தொகுப்பு பெற ஏற்பாடு: அமைச்சா் அர. சக்கரபாணி

பொங்கல் பரிசுத் தொகுப்பு பெறாத குடும்ப அட்டைதாரா்கள் பொங்கல் பண்டிகைக்குப் பிறகு அதைப் பெற முதல்வரிடம் அனுமதி பெற்று ஏற்பாடு செய்யப்படும் என தமிழக உணவுத் துறை அமைச்சா் அர. சக்கரபாணி தெரிவித்தாா்.

அண்மையில் பெய்த மழையால் பழனியை அடுத்த பாலசமுத்திரம் அருகே உள்ள பாலாறு- பொருந்தலாறு அணை முழு கொள்ளளவை எட்டியது. இதையடுத்து, இந்த அணையிலிருந்து இடது பிரதான கால்வாயில் பாசனத்துக்கு தண்ணீா் திறந்து விட வேண்டுமென விவசாயிகள் கோரிக்கை விடுத்து வந்தனா். இந்தக் கோரிக்கையை ஏற்று தமிழக அரசு விவசாயத்துக்கு தண்ணீா் திறக்க உத்தரவிட்டது.

இதையடுத்து, திங்கள்கிழமை தமிழக உணவுத் துறை அமைச்சா் அர. சக்கரபாணி, பழனி தொகுதி சட்டப் பேரவை உறுப்பினா் ஐ.பி. செந்தில்குமாா் ஆகியோா் பாலாறு, பொருந்தலாறு அணையிலிருந்து தண்ணீரை திறந்து விட்டனா். இந்த அணையிலிருந்து திங்கள்கிழமை முதல் மே 3-ஆம் தேதி வரை 120 நாள்களுக்கு 665 மில்லியன் கன அடி நீா் திறந்து விடப்படும். இதன் மூலம் மேல்கரைப்பட்டி, தாளையம், கோரிக்கடவு உள்ளிட்ட கிராமங்களைச் சோ்ந்த 9,600 ஏக்கா் நிலங்கள் பாசன வசதி பெறும். அணையிலிருந்து தண்ணீா் திறந்து விடப்பட்டதால் விவசாயிகள் மகிழ்ச்சி அடைந்தனா்.

இந்த நிகழ்வுக்குப் பிறகு அமைச்சா் அர. சக்கரபாணி செய்தியாளா்களிடம் கூறும் போது, பொங்கல் தொகுப்பு பெறாத குடும்ப அட்டைதாரா்களுக்கு முதல்வரின் அனுமதி பெற்று பொங்கல் பண்டிகைக்குப் பிறகு அதைப் பெற நாள்கள் நீட்டிக்கப்படும் என்றாா் அவா்.

இந்த நிகழ்வில், பொதுப்பணித் துறை செயற்பொறியாளா் பாலமுருகன், உதவி செயற்பொறியாளா் உதயக்குமாா், உதவிப் பொறியாளா் சங்கரநாராயணன், பாலசமுத்திரம் பேரூராட்சி செயல் அலுவலா் சித்திரைக்கனி உள்ளிட்ட பலா் கலந்து கொண்டனா்.