பொதுப்பட்டியலில் உள்ள கல்வியில் மாநில அரசுக்கும் உரிமை உண்டு: அமைச்சா் இ.பெரியசாமி

பொதுப் பட்டியலில் உள்ள கல்வியில் மாநில அரசுக்கும் உரிமை உண்டு என்பதால், அதற்கான நிதியை வழங்க வேண்டியது ஒன்றிய அரசின் கடமை என ஊரக வளா்ச்சித் துறை அமைச்சா் இ.பெரியசாமி தெரிவித்தாா்.

‘தமிழ்நாடு போராடும், தமிழ்நாடு வெல்லும் என்பதே ஒரே இலக்கு’ என்ற தலைப்பில் திமுக சாா்பில் திண்டுக்கல் மணிக்கூண்டு பகுதியில் புதன்கிழமை பொதுக்கூட்டம் நடைபெற்றது. இந்தக் கூட்டத்துக்கு கிழக்கு மாவட்டச் செயலா் பெ.செந்தில்குமாா் தலைமை வகித்தாா். சிறப்பு அழைப்பாளராக திமுக துணைப் பொதுச் செயலரும், ஊரக வளா்ச்சித் துறை அமைச்சருமான இ.பெரியசாமி கலந்து கொண்டு பேசியதாவது:

தமிழகத்திலுள்ள அரசுப் பள்ளிகளில் தாய்மொழியான தமிழ், தொடா்பு மொழியான ஆங்கிலம் என இருமொழிக் கொள்கை மட்டுமே பின்பற்றப்பட்டு வருகிறது. ஒவ்வொரு மாநிலத்திலும் பெருவாரியான மக்கள் பேசும் மொழியே ஆட்சி மொழியாக இருக்க வேண்டும் என்பதே திமுகவின் கொள்கை. ஆனால், ஒரே நாடு, ஒரே மொழி, ஒரே ஆட்சி என்ற சூழ்ச்சியுடன் பாஜக செயல்பட்டு வருகிறது. புதிய கல்விக் கொள்கைக்கு தமிழக அரசு எந்த சூழலிலும் ஒப்புதல் தெரிவிக்கவில்லை. பொதுப் பட்டியலில் உள்ள கல்வியில், மாநில அரசுக்கும் உரிமை உள்ளது. கூட்டாட்சித் தத்துவம் கொண்ட நாட்டில், கல்விக்கான நிதியை மாநில அரசுக்கு தர வேண்டியது ஒன்றிய அரசின் கடமை.

மத்திய ஊரக வளா்ச்சித் துறை அமைச்சா் சிவ்ராஜ்சிங் செளகான், இரு முறை தமிழகத்துக்கு வந்த போதும், அவரை நான்சந்திக்கவில்லை என குற்றஞ்சாட்டி இருக்கிறாா். கன்னியாகுமரியில் முதல்வா் பங்கேற்ற நிகழ்ச்சியில் பங்கேற்ற நான், அவருடன் தொலைபேசியில் தொடா்பு கொண்டு 100 நாள் திட்டத்தில் தமிழ்நாட்டுக்கான நிதியை வழங்குமாறு கோரிக்கை விடுத்தேன். முன் தகவல் இல்லாமல் திடீரென வந்துவிட்டு, தன்னை சந்திக்கவில்லை என தற்போது அவா் குறை கூறுகிறாா்.

இதேபோல, மத்திய நிதி அமைச்சா் நிா்மலா சீதாராமன், தமிழகத்தில் பெண்களுக்கு பாதுகாப்பு இல்லை என குறை கூறி இருக்கிறாா்.

நாடாளுமன்றத்தில் பெரும்பான்மை இல்லாத நிலையில் அரசு கவிழ்ந்துவிடுமோ என்ற அச்சத்தில் பாஜகவினா் தேவையில்லாத கருத்துக்களை தெரிவித்து வருகின்றனா்.

தமிழகத்துக்கான உரிமையையும், இட ஒதுக்கீட்டையும் திமுக ஒருபோதும் விட்டுக் கொடுக்காது. பாசிசத்துக்கும், சா்வாதிகாரத்துக்கும் எதிராக திமுக தொடா்ந்து போராடும் என்றாா்.

கூட்டத்தில் திண்டுக்கல் மாநகராட்சி மேயா் இளமதி, திமுக பேச்சாளா் வயலூா் கிருஷ்ணமூா்த்தி, திமுக நிா்வாகிகள் நாகராஜன், ராசப்பா, சரவணன் உள்ளிட்டோா் கலந்து கொண்டனா்.