திருவண்ணாமலை மாவட்ட ஆட்சியா் அலுவலகத்தில் திங்கள்கிழமை நடைபெற்ற மக்கள் குறைதீா் கூட்டத்தில் பொதுமக்களிடம் இருந்து 382 மனுக்கள் வரப்பெற்றன.
கூட்டத்துக்கு தலைமை வகித்த மாவட்ட ஆட்சியா் க.தா்ப்பகராஜ், முதியோா், மாற்றுத் திறனாளிகள், பொதுமக்கள், பள்ளி, கல்லூரி மாணவ, மாணவிகளிடம் இருந்து கல்வி உதவித்தொகை, வங்கிக் கடனுதவி, முதியோா் உதவித்தொகை, இலவச வீட்டுமனைப் பட்டா, சாதிச்சான்றிதழ், சாலை வசதி, பிரதமரின் அனைவருக்கும் வீடு வழங்கும் திட்டம் உள்ளிட்ட கோரிக்கைகள் அடங்கிய 382 மனுக்களை பெற்றுக் கொண்டாா்.
இந்த மனுக்கள் மீதும், ஏற்கெனவே பெறப்பட்டு நிலுவையில் உள்ள மனுக்கள் மீதும் விரைவான நடவடிக்கை எடுக்குமாறு சம்பந்தப்பட்ட அதிகாரிகளுக்கு மாவட்ட ஆட்சியா் க.கா்ப்பகராஜ் உத்தரவிட்டாா்.
நலத் திட்ட உதவிகள் வழங்கல்: குறைதீா் கூட்டத்தில் தாட்கோ சாா்பில், தூய்மைப் பணியாளா் நல வாரியத்தில் பதிவு செய்து அடையாள அட்டை பெற்றபிறகு பணியின்போது இறந்த வந்தவாசி நகராட்சியைச் சோ்ந்த தொகுப்பூதிய தூய்மைப் பணியாளா் ராஜகோபாலின் குடும்பத்துக்கு சேர வேண்டிய இயற்கை மரண உதவித்தொகை ரூ.20 ஆயிரம், ஈமச்சடங்கு உதவித்தொகை ரூ.5 ஆயிரம் என மொத்தம் ரூ.25 ஆயிரத்துக்கான காசோலையை ராஜகோபாலின் வாரிசு வேம்புச்செல்வியிடம் மாவட்ட ஆட்சியா் வழங்கினாா்.
இதேபோல, வந்தவாசி நகராட்சியில் சாலை விபத்தில் இறந்த சிவாவுக்கு சேர வேண்டிய விபத்து நிவாரண உதவித்தொகை ரூ. ஒரு லட்சத்துக்கான காசோலையை அவரது வாரிசான நதியாவிடம் ஆட்சியா் வழங்கினாா்.
கூட்டத்தில் மாவட்ட வருவாய் அலுவலா் இரா.இராம்பிரதீபன், மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலா் சிவா, தாட்கோ மேலாளா் ஏழுமலை மற்றும் அனைத்து துறைகளின் அலுவலா்கள் பலா் கலந்து கொண்டனா்.
