மதுராந்தகம் பகுதியில் சில கிராமங்களில் குடிநீரால் சிறுநீரக பாதிப்பு: குறைதீா் கூட்டத்தில் விவசாயிகள் கவலை

மதுராந்தகம் பகுதியில் ஒரு சில கிராமங்களில் பொதுமக்கள் குடிநீரை அருந்துவதால் சிறுநீரக பாதிப்பு ஏற்படுவதாக விவசாயிகள் தெரிவித்தனா்.

செங்கல்பட்டு மாவட்ட ஆட்சியா் அலுவலக கூட்டரங்கில், விவசாயிகள் நலன் காக்கும் நாள் கூட்டம் மாவட்ட ஆட்சியா் ச.அருண்ராஜ் தலைமையில் வெள்ளிக்கிழமை நடைபெற்றது.

கூட்டத்தில் விவசாயிகள் மற்றும் விவசாய சங்க பொறுப்பாளா்கள் கலந்து கொண்டு கோரிக்கை மனுக்களை வழங்கினா். அவற்றின் மீது உரிய நடவடிக்கை எடுக்க துறை சாா்ந்த அலுவலா்களுக்கு ஆட்சியா் உத்தரவிட்டாா்.

கூட்டத்தில் விவசாயிகள் வலியுறுத்திய கோரிக்கைகள்: மாவட்டத்தில் உள்ள ஏரி, குளங்களை தூா்வாரி சீா்செய்து தருமாறு கேட்டுக் கொண்டனா். மேலும் ஏரி, குளங்களைச் சுற்றியுள்ள ஆக்கிரமிப்புகளை அகற்றி, வடிகால் அமைத்துத் தர நடவடிக்கை மேற்கொள்ளுமாறு கோரிக்கை விடுத்தனா். நேரடிநெல் கொள்முதல் நிலையங்கள் அமைத்தமைக்காக ஆட்சியருக்கு விவசாய சங்கத்தினா் நன்றி தெரிவித்தனா்.

உலா்களம் அமைக்க விவசாய சங்கத்தினரால் கோரிக்கை வைக்கப்பட்டது. உடனடியாக அமைத்துத்தர நடவடிக்கை மேற்கொள்ளுமாறு அலுவலா்களுக்கு மாவட்ட ஆட்சியா் உத்தரவிட்டாா்.

நீரின் தன்மையைப் பரிசோதித்து அறிக்கை அனுப்ப உத்தரவு: மதுராந்தகம் பகுதியில் ஒரு சில கிராமங்களில் பொதுமக்கள் குடிநீரை அருந்துவதால் சிறுநீரக பாதிப்பு ஏற்படுவதாகத் தெரிவித்தனா். மாவட்ட ஆட்சியா் துறை அலுவலா்களுக்கு உடனடியாக அப்பகுதிக்குச் சென்று நீரின் தன்மையைப் பரிசோதித்து குடிநீரால் சிறுநீரக பாதிப்பு ஏற்படுகிா அல்லது வேறு காரணங்களால் பாதிப்பு ஏற்படுகின்ா என்பதை அறிக்கையாக சமா்ப்பிக்க அறிவுறுத்தினாா்.

மதுராந்தகம் பகுதியில் சாலை அமைத்துத் தர விவசாய சங்கத்தினா் கோரினா். அதற்கு மதுராந்தகம் வட்டார வளா்ச்சி அலுவலா் இந்நிதியாண்டில் அதற்கான நிதி வசதி இல்லாததால் அடுத்த நிதியாண்டில் ரூ.60 லட்சம் மதிப்பீட்டில் சாலை அமைத்துத் தரப்படும் என உறுதியளித்தாா்.

மதுராந்தகம் பகுதியில் தனியாா் உரக்கடைகளில் அரசு அறிவித்த விலையைவிட அதிக விலைக்கு விவசாய இடு பொருள்களை விற்பனை செய்வதாகவும், அதற்கான ரசீதுகளை கொடுக்க மறுப்பதாகவும் கூறினா். அதற்கு மாவட்ட ஆட்சியா், வேளாண்மைத் துறை அதிகாரிகளை நேரடியாக அப்பகுதிகளுக்குச் சென்று விசாரணை செய்து உரிய நடவடிக்கை எடுக்குமாறு அறிவுறுத்தினாா்.

குறைந்த அழுத்த மின்சாரம் வருவதால் விவசாய மோட்டாா்கள் இயக்குவதில் சிரமமாக உள்ளது எனதெரிவித்தனா். உயா் அழுத்த மின்சாரமாக உடனடியாக மாற்றித் தருமாறு மின்சாரத் துறை அலுவலா்களிடம் மாவட்ட ஆட்சியா் உத்தரவிட்டாா்.

வேளாண் பொறியியல் துறையினரால் விவசாயிகளுக்கு அளிக்கப்படும் டிராக்டா்களை விவசாய பணியைத் தவிர வேறு பணிகளுக்கு பயன்படுத்தக் கூடாது என்று தொடா்புடைய துறை அலுவலா்களுக்கு அறிவுறுத்தினாா்.

கூட்டத்தில் மாவட்ட வன அலுவலா் ரவி மீனா, மாவட்ட ஆட்சியரின் நோ்முக உதவியாளா் (வேளாண்மை) ராஜேஸ்வரி, இணை இயக்குநா் (வேளாண்மை) பிரேம் சாந்தி, முதுநிலை மண்டல மேலாளா் ரேணுகாம்பாள், தமிழ்நாடு மின்சார வாரிய மேற்பாா்வைப் பொறியாளா் அன்புசெல்வன், படாளம் கூட்டுறவு சா்க்கரைஆலை இணை இயக்குநா் தமிழ்ச்செல்வி, வேளாண்மை செயற்பொறியாளா் அருண் போஸ்கோ மற்றும் அரசு அலுவலா்கள், விவசாயிகள், விவசாய சங்க பிரதிநிதிகள் கலந்து கொண்டனா்.