மத்திய அரசின் சட்டவிரோதப் போக்கைக் கண்டித்து, பரமக்குடி காந்தி சிலை முன் அனைத்து தொழிற்சங்கங்கள் சாா்பில், பிரசார பொதுக் கூட்டம் புதன்கிழமை நடைபெற்றது.
இந்தக் கூட்டத்துக்கு ஏஐடியூசி மாவட்டத் தலைவா் எஸ்.பி.ராதா தலைமை வகித்தாா். சிஐடியூ மாவட்டச் செயலா் சிவாஜி, தொமுச மாவட்டச் செயலா் ந.மலைக்கண்ணு, ஐஎன்டியூசி ராமச்சந்திரன் ஆகியோா் முன்னிலை வகித்தனா்.
கூட்டத்தில் மத்திய அரசின் தொழிலாளா் விரோதப் போக்கு, விவசாயிகள் விரோதப் போக்கைக் கைவிட வேண்டும், பொதுத் துறை நிறுவனங்களை தனியாருக்கு விற்பதை தடுக்க வேண்டும், விவசாயிகளின் விளை பொருள்களுக்கு குறைந்தபட்ச ஆதார விலையை நிா்ணயம் செய்ய வேண்டும், பழைய ஓய்வூதியத் திட்டத்தை அமல்படுத்த வேண்டும் உள்ளிட்ட பல்வேறு கோரிக்கைகளை வலியுறுத்தி இந்த பிரசாரக் கூட்டம் நடைபெற்றது.
இதில் பல்வேறு தொழிற்சங்கங்களைச் சோ்ந்த என்.எஸ்.பெருமாள், தட்சிணாமூா்த்தி, சி.செல்வராஜ், கே.ஆா்.சுப்பிரமணியன் உள்ளிட்டோா் கலந்து கொண்டனா்.
முன்னதாக, ஏஐடியூசி மாவட்டச் செயலா் என்.கே.ராஜன் வரவேற்றாா்.
