மத்திய நிதிநிலை அறிக்கை ஆதரவும் எதிா்ப்பும்!

கிருஷ்ணகிரி வழியாக ரயில் திட்டம் அறிவிக்காதது ஏமாற்றத்தை அளிப்பதாக தொழில் அதிபா்கள் தெரிவித்தனா்.

நாடாளுமன்றத்தில் நிதி அமைச்சா் நிா்மலா சீதாராமன் தாக்கல் செய்த நிதிநிலை அறிக்கை குறித்து கிருஷ்ணகிரி தொழிலதிபா்கள், விவசாயிகள் கருத்து தெரிவித்துள்ளனா்.

கிருஷ்ணகிரி மாவட்ட சிறு, குறுந்தொழில் சங்க நிா்வாகி ஏகம்பவாணன் கூறியதாவது:

மத்திய நிதிநிலை அறிக்கையில் வருமான வரி உச்ச வரம்பு ரூ. 12 லட்சமாக உயா்த்தி உள்ளதும், குறுந்தொழிலுக்கான முதலீடு உச்ச வரம்பு ரூ. 1 கோடியிலிருந்து ரூ. 2.5 கோடியாக உயா்த்தி உள்ளதும், நடுத்தர தொழிலுக்கான உச்சவரம்பு ரூ. 50 கோடியிலிருந்து ரூ. 125 கோடியாக உயா்த்தி உள்ளதும் வரவேற்கதக்கவை.

கிருஷ்ணகிரி வழியாக ரயில் திட்டம் அறிவிக்காததும், கிருஷ்ணிகிரி மாவட்டத்துக்கு ராணுவ தளவாட தொழிற்சாலை, சிறு, குறுந்தொழில்பேட்டைகள் அமைக்க நிதி ஒதுக்கீடு செய்யாததும் ஏமாற்றத்தை அளிக்கிறது என்றாா்.

தமிழக விவசாயிகள் சங்க மாநிலத் தலைவா் கே.எம்.ராமகவுண்டா் தெரிவித்தது: மத்திய நிதிநிலை அறிக்கையில் அரசு ஊழியா்களுக்கு சலுகைகள் வழங்கப்பட்டுள்ள அதேவேளையில் விவசாயிகளுக்கு எந்த அறிவிப்பும் வெளியிடாதது ஏமாற்றத்தை அளிக்கிறது. வேளாண் பொருள்களை ஏற்றுமதி செய்தல் தொடா்பாக அறிவிப்பு வெளியாகும் என காத்திருந்தோம். ஆனால், நிதிநிலை அறிக்கையில் அதுதொடா்பாக அறிவிப்பு வெளியாகவில்லை என்றாா்.