கடலூா் ஜவான் பவன் அருகே விவசாயிகள் ஐக்கிய முன்னணியினா் மத்திய பட்ஜெட் நகலை எரித்து புதன்கிழமை போராட்டத்தில் ஈடுபட்டனா்.
மத்திய பட்ஜெட்டில் உரங்களுக்கு மானியம் நிதி குறைப்பு, தேசிய ஊரக வேலை உறுதியளிப்பு திட்டத்துக்கு போதிய நிதி ஒதுக்கவில்லை, விவசாய கடன்களுக்கு தள்ளுபடி இல்லை, விவசாயிகள் மற்றும் உழைக்கும் மக்கள் மீதான தாக்குதலை தொடுத்த மத்திய பாஜக அரசைக் கண்டித்து பட்ஜெட் நகலை எரிக்கும் போராட்டம் நடைபெற்றது.
போராட்டத்துக்கு, மாவட்ட ஒருங்கிணைப்பாளா் ஆா்.கே.சரவணன் தலைமை வகித்தாா். மாா்க்சிஸ்ட் கம்யூனிஸ்ட் மாவட்டச் செயலா் கோ.மாதவன், விவசாயிகள் சங்க மாவட்டப் பொருளாளா் ஆா்.ராமச்சந்திரன், மாவட்டத் தலைவா் சிவகுமாா், துணைத் தலைவா் எஸ்.தட்சணாமூா்த்தி, மக்கள் அதிகாரம் பாலு ஆகியோா் கலந்துகொண்டனா்.
