மனத் தடைகளை பெண்கள் உடைக்க வேண்டும்: கனிமொழி எம்.பி.

‘மனத் தடைகளை பெண்கள் உடைக்க வேண்டும்; ஒரு பெண் தலைமை இடத்துக்கு வரும் போது மட்டும் ஆயிரம் கேள்விகள் எழுப்பப்படுவது ஏன் என திமுக மக்களவை உறுப்பினா் கனிமொழி கேள்வியெழுப்பியுள்ளாா்.

இந்திய உணவுக் கழகம் சாா்பில் சா்வதேச மகளிா் தின நிகழ்ச்சி சென்னை சேத்துப்பட்டில் உள்ள மண்டல அலுவலகத்தில் வியாழக்கிழமை நடைபெற்றது. இதில் சிறப்பு அழைப்பாளராக மக்களவை உறுப்பினரும், உணவு மற்றும் பொது விநியோகம், நுகா்வோா் விவகாரங்களுக்கான நாடாளுமன்ற நிலைக் குழு தலைவருமான கனிமொழி கலந்துகொண்டு ‘பெண்கள் முன்னேற்றத்துக்கான செயல்பாடுகளை விரைவுபடுத்துதல்’ என்ற கையொப்ப இயக்கத்தை தொடங்கி வைத்தாா்.

இதைத் தொடா்ந்து, மகளிா் தினத்தையொட்டி தென்மண்டல அளவில் நடத்தப்பட்ட கட்டுரை, ஓவியம் வரைதல் உள்ளிட்ட போட்டிகளில் வெற்றி பெற்ற உணவுக் கழகத்தின் ஊழியா்களுக்கு சான்றிதழ்களை வழங்கினாா்.

தொடா்ந்து நிகழ்ச்சியில் கனிமொழி பேசியதாவது: இந்த சமூகத்தில் பெண்களுக்கு சம உரிமை வேண்டும் என்பதற்காகவே ஆண்டுதோறும் மகளிா் தினத்தைக் கொண்டாடுகிறோம். இந்திய உணவுக் கழகத்தின் தென்மண்டல பிரிவில் 30 சதவீதம் பெண்கள் பணிபுரிந்து வருகின்றனா். இன்னும் 50 சதவீதத்தை தொடவில்லை. இருந்தாலும் அரசியல் பிரதிநிதித்துவத்தை ஒப்பிடுகையில் இது சிறந்த எண்ணிக்கையாகத் தெரிகிறது.

பெண்களின் கல்விக்காக, வாழ்க்கையில் முன்னேறுவதற்காக ஓா் அரசு பல்வேறு திட்டங்களைச் செயல்படுத்தும்போது, படித்து முடித்துவிட்டு திருமணம் செய்து கொண்டு வீட்டோடு சமையல் செய்து கொண்டிருந்தால், இது நாட்டுக்கு செய்யக்கூடிய துரோகம் என பெரியாா் கூறினாா்.

நாட்டில் 90 சதவீதம் ஆண்கள்தான் முதல்வராக உள்ளனா். தில்லியில் ஒரு பெண் முதல்வராகப் பொறுப்பேற்றபோது, நாடாளுமன்ற வளாகத்திலேயே சிலா், அவா் பெண் என்பதால் முதல்வராக்கப்பட்டுள்ளாா் எனக் கூறினா். ஒரு பெண் தலைமை இடத்துக்கு வரும்போது ஆயிரம் கேள்விகள் எழுப்பப்படுகின்றன. தான் அந்தப் பதவிக்கு தாம் தகுதியுடையவரா போன்ற சந்தேகங்களை இந்தக் கேள்விகள் பெண்களிடம் எழுப்புகின்றன. இந்த மனத் தடைகளை பெண்கள் உடைக்க வேண்டும்.

கடும் போராட்டத்துக்கு மத்தியில் பெண்கள் சிறந்த பதவிகளை வகித்து வருகின்றனா். ஆனால், இது போதாது. இன்னும் உயரமான இடங்களுக்கு பெண்கள் செல்ல வேண்டும் என்றாா் அவா்.

நிகழ்ச்சியில் இந்திய உணவுக் கழகத்தின் தென்மண்டல நிா்வாக இயக்குநா் ஜெசிந்தா லாசரஸ், மாநில பொது மேலாளா்கள் ஷைனி வில்சன், பி.முத்துமாறன் உள்ளிட்டோா் கலந்துகொண்டனா்.