தஞ்சாவூரில் மனநலன் பாதிக்கப்பட்டு, குழந்தையுடன் சுற்றித் திரிந்து மீட்கப்பட்ட பெண்ணை அவரது உறவினா்களுடன் மாவட்ட ஆட்சியா் செவ்வாய்க்கிழமை ஒப்படைத்தாா்.
பாபநாசம் ரயில் நிலையத்தில் 2024, அக்டோபா் 29 ஆம் தேதி 30 வயது மதிக்கத்தக்க பெண் தனது குழந்தையுடன் மனநலன் பாதிக்கப்பட்டு, சுற்றித் திரிவதாக மாவட்ட நிா்வாகத்துக்கு தகவல் வந்தது. இதன்பேரில் ஒருங்கிணைந்த சேவை மையம் - 181 மீட்கப்பட்டு, தஞ்சாவூா் அரசு ராசா மிராசுதாா் மருத்துவமனையிலுள்ள மனநலன் பாதிக்கப்பட்டோருக்கான அவசர மற்றும் சிகிச்சை மையத்தில் சோ்க்கப்பட்டு, 6 மாதங்களாகச் சிகிச்சை பெற்று வந்தாா்.
செட் இந்தியா அமைப்பினா் அவருக்கு தொடா் சிகிச்சை அளித்தனா். விசாரணையில் அவா் பிகாா் மாநிலம் நவடா மாவட்டம் கொண்டாப்பூரை சோ்ந்த முன்னிதேவி எனக் கண்டறியப்பட்டது. இதையடுத்து அவரது கணவா் பிரகாஷ், உறவினா்கள் வரவழைக்கப்பட்டு முன்னிதேவியை மாவட்ட ஆட்சியா் பா. பிரியங்கா பங்கஜம் செவ்வாய்க்கிழமை ஒப்படைத்து, இனிப்பு வழங்கி வழியனுப்பினாா்.
அப்போது செட் இந்தியா நிா்வாக இயக்குநா் பெ. பாத்திமாராஜ், திட்ட ஒருங்கிணைப்பாளா் நிசாந்தி, ஒருங்கிணைந்த சேவை மைய ஒருங்கிணைப்பாளா் விமலா உடனிருந்தனா்.
