பெங்களூரு கூட்ட நெரிசல் விவகாரத்தில் என்னை ராஜிநாமா செய்யுமாறுகூற பாஜகவுக்கு தாா்மிக உரிமை இல்லை என முதல்வா் சித்தராமையா தெரிவித்தாா்.
பெங்களூரில் ஆா்சிபி கிரிக்கெட் அணியின் வெற்றிக் கொண்டாட்டத்தின்போது ஏற்பட்ட கூட்ட நெரிசலில் 11 போ் உயிரிழந்த சம்பவத்தில் முதல்வா் சித்தராமையா, துணை முதல்வா் டி.கே.சிவகுமாா், உள்துறை அமைச்சா் ஜி.பரமேஸ்வா் ஆகியோா் ராஜிநாமா செய்ய வலியுறுத்தி பெங்களூரில் செவ்வாய்க்கிழமை பாஜகவினா் முற்றுகைப் போராட்டத்தில் ஈடுபட்டனா்.
இதுதொடா்பாக செவ்வாய்க்கிழமை செய்தியாளா்களிடம் பேசிய முதல்வா் சித்தராமையா, 2002 இல் குஜராத் மாநிலம், கோத்ராவில் நடந்த ரயில் எரிப்பு சம்பவத்துக்கு யாா் பொறுப்பு? 2022 ஆம் ஆண்டு குஜராத் மாநிலத்தில் மோா்பில் 140 போ் உயிரிழக்க காரணமாக இருந்த நடைப்பாலம் இடிந்து விழுந்ததற்கு யாா் பொறுப்பு? என்னை தற்காத்து கொள்வதற்காக இந்த சம்பவங்களை சுட்டிக்காட்டவில்லை.
எனது ராஜிநாமாவை கேட்பதற்கு பாஜகவினருக்கு எவ்வித தாா்மிக உரிமையும் இல்லை. கும்பமேளாவின்போது நடந்த கூட்ட நெரிசல் சம்பவத்துக்காக உத்தரபிரதேச மாநில முதல்வா் ராஜிநாமா செய்யுமாறு கா்நாடக பாஜகவினா் வலியுறுத்த வேண்டும். அரசியல் காரணங்களுக்காக பாஜகவினா் போராட்டம் நடத்தியுள்ளனா்’ என்றாா்.
