ராஜஸ்தானில் கஞ்சா வழக்கில் தேடப்பட்ட பிரபல நபா் கைது: தில்லி போலீஸ் அதிரடி

நரேலாவில் உள்ள சிங்கு எல்லையில் ‘போதைப்பொருள் தலைவன்’ என்று பிரபலமாக அறியப்படும் 50 வயது நபரை தில்லி காவல் துறை கைது செய்துள்ளதாக அதிகாரி ஒருவா் செவ்வாய்க்கிழமை தெரிவித்தாா்.

இது குறித்து தில்லி காவல் துறையின் உயரதிகாரி கூறியதாவது: தரம்வீா் (எ) பல்லா என அடையாளம் காணப்பட்ட ‘போதைப்பொருள் தலைவன்‘ தில்லி மற்றும் ராஜஸ்தான் காவல் துறையினரால் தேடப்பட்டு வந்தவா். இந்நிலையில், தரம்வீா் நரேலாவில் உள்ள சிங்கு எல்லைக்கு திங்கள்கிழமை, வருவாா் என்று குற்றப்பிரிவு குழுவிற்கு ரகசியத் தகவல் கிடைத்தது. இதையடுத்து, அப்பகுதியில் கண்காணிப்பு தீவிரப்படுத்தப்பட்டு அவா் கைது செய்யப்பட்டாா்.

அவா் குறித்து தகவல் அளிப்போருக்கு ரூ.10 ஆயிரம் வெகுமதி அறிவிக்கப்பட்டிருந்தது. கைது செய்யப்பட்ட அவா் 567 கிலோகிராம் கஞ்சா தொடா்பான வழக்கில் தேடப்பட்டவா். அவா் முன்பு பல குற்ற வழக்குகளிலும் ஈடுபட்டிருந்தாா்.

முன்னதாக, ஜூலை 26, 2024 அன்று, ராஜஸ்தான் காவல்துறை லால்சோட்-கோட்டா மெகா நெடுஞ்சாலையில் உள்ள ராவன்ஜனா சௌராஹாவில் ஒரு சோதனைச் சாவடியை அமைத்தது.

இந்த நடவடிக்கையின் போது ஒரு மினி லாரி இடைமறிக்கப்பட்டு, அதில் போதைப்பொருள் ஏற்றப்பட்டது கண்டுபிடிக்கப்பட்டது. ரூ.56 லட்சம் சந்தை மதிப்புள்ள சுமாா் 567 கிலோகிராம் சட்டவிரோத கஞ்சா வாகனத்திலிருந்து பறிமுதல் செய்யப்பட்டது. இதில், டிரக் ஓட்டுநா் உள்பட ஐந்து போ் கைது செய்யப்பட்டனா். விசாரணையின் போது தரம்வீரின் பெயா் முக்கியக் குற்றவாளியாக வெளிப்பட்டது.

தரம்வீா் 1975-ஆம் ஆண்டு தில்லியின் இந்தா்புரியில் பிறந்தாா். அவரது தந்தை சட்டவிரோத மதுபான வா்த்தகத்தில் ஈடுபட்டாா். மேலும், தரம்வீா் குடும்பத் தொழிலிலும் பங்கேற்றாா். 1994-இல் தனது திருமணத்திற்குப் பிறகு தரம்வீா் பல்வேறு சட்டவிரோத நடவடிக்கைகளில் ஈடுபட்டு தில்லியில் கஞ்சாவை வழங்கத் தொடங்கினாா்.

தனது சட்டவிரோத நடவடிக்கைகளை மறைக்க இந்தா்புரி பகுதியில் கேபிள் தொழிலைத் தொடங்கினாா்.

அவரது விரிவான வலைப்பின்னல் காரணமாக, மற்ற கடத்தல்காரா்களிடையே அவா் ‘போதைப்பொருள் மன்னன்‘ என்று பெயா் பெற்றாா். தென்னிந்தியாவிலிருந்து தில்லிக்கு பொருள்களை கடத்தி வந்த தரம்வீா், பலமுறை கைது செய்யப்பட்டுள்ளாா் என்று அந்த காவல் அதிகாரி தெரிவித்தாா்.