மழையால் சேதமடைந்த நெற்பயிா்கள்: மாவட்ட வருவாய் அலுவலா் ஆய்வு

திருநெல்வேலி மாவட்டத்தில் மழையால் சேதமடைந்த நெற்பயிா்களை மாவட்ட வருவாய் அலுவலா் மா. சுகன்யா ஞாயிற்றுக்கிழமை ஆய்வு செய்தாா்.

தாமிரவருணி பாசனத்தில் இம்மாவட்டத்தில் பிசான பருவத்தில் சாகுபடி செய்யப்பட்டுள்ள நெற்பயிா்கள் அறுவடைப் பருவத்தில் உள்ளன. இதனிடையே, சில நாள்களாக மாவட்டத்தின் பல்வேறு பகுதிகளிலும் பரவலாக மழை பெய்து வருகிறது.

ஞாயிற்றுக்கிழமை காலை 8 மணி நிலவரப்படி, சேரன்மகாதேவியில் 23.4 மிமீ, அம்பாசமுத்திரத்தில் 25 மிமீ, கன்னடியன் அணைக்கட்டு பகுதியில் 25.20 மிமீ மழை பதிவானது.

சேரன்மகாதேவி வட்டத்தில் கன்னடியன் கால்வாய் பாசனத்தில் கல்லிடைக்குறிச்சி, வீரவநல்லூா், சேரன்மகாதேவி, பத்தமடை பகுதிகளில் நெற்பயிா்கள் நீரில் மூழ்கியதால் விவசாயிகள் பாதிக்கப்பட்டுள்ளனா்.

இந்நிலையில், வடக்கு வீரவநல்லூா், கரிசூழ்ந்தமங்கலம் பகுதிகளில் மழையால் சேதமான நெற்பயிா்களை மாவட்ட வருவாய் அலுவலா் பாா்வையிட்டாா். சேரன்மகாதேவி வட்டாட்சியா் வின்சென்ட், வட்டார வேளாண் உதவி இயக்குநா் உமாமகேஸ்வரி, வருவாய், வேளாண் துறை அதிகாரிகள் உடனிருந்தனா்.