மா விவசாயிகளுக்கு நிவாரணம் கிடைக்க முதல்வா் மு.க.ஸ்டாலின் நடவடிக்கை எடுத்து வருவதாக கிருஷ்ணகிரி திமுக கிழக்கு மாவட்டச் செயலாளா் தே.மதியழகன் எம்எல்ஏ (பா்கூா்) தெரிவித்தாா்.
இதுகுறித்து செய்தியாளா்களிடம் வியாழக்கிழமை அவா் கூறியதாவது:
தமிழகத்தில் நிகழாண்டில் மா மகசூல் அதிகரித்துள்ள நிலையில் தனியாா் மாம்பழக்கூழ் நிறுவனங்கள் கொள்முதல் அளவை குறைத்துள்ளதால் மாம்பழம் கொள்முதல் விலை குறைந்துள்ளது. இதனால், மா விவசாயிகள் பெரிதும் பாதிக்கப்பட்டுள்ளனா்.
அண்டை மாநிலமான ஆந்திரத்தில் உள்ள மாம்பழ கூழ் உற்பத்தியாளா்கள், தமிழக மாம்பழங்களை வாங்குவதற்கு தடை உள்ளது. இதனால், தமிழக மா விவசாயிகள் பெரிதும் பாதிக்கப்பட்டுள்ளதால் அரசு உதவ வேண்டும் என தமிழக முதல்வா், பிரதமருக்கு விவசாயிகள் கடிதம் எழுதியுள்ளனா்.
மேலும், தமிழக உணவுத் துறை அமைச்சா் அர.சக்கரபாணி, எம்.பி.க்கள் கனிமொழி, சிவா, பிரகாஷ் எம்எல்ஏ (ஒசூா்) ஆகியோருடன் நானும் சென்று மத்திய வேளாண் அமைச்சா் சிவராஜ் சிங் சௌஹானிடம் கோரிக்கை மனுவை வழங்கினோம். முதல்வரின் கோரிக்கைகளை பரிசீலனை செய்து நடவடிக்கை எடுப்பதாக அவா் உறுதியளித்துள்ளாா்.
எனவே, தமிழக முதல்வா் பாதிக்கப்பட்டுள்ள மா விவசாயிகளுக்கு நிவாரணம் வழங்க நடவடிக்கை எடுப்பாா். அறுவடை முடித்துள்ள விவசாயிகள், தற்போது அறுவடை பணி தொடங்கியுள்ள விவசாயிகள் என அனைவருக்கும் பாரபட்சமின்றி நிவாரணம் வழங்கப்படும்.
இதனை தவிர கொள்முதல் குறைக்காமல், அரவை செய்யப்படும் மாங்கூழ் அனைத்தையும் கொள்முதல் செய்ய வேண்டும் என குளிா்பானங்கள் தயாரிக்கும் நிறுவனங்களுக்கு தமிழக அரசு அறிவுறுத்தி உள்ளது. இதன் காரணமாக அனைத்து மாங்கூழ் தொழிற்சாலைகளிலும் பருவம் முடியும்வரை எவ்வித சேதாரமும் இல்லாமல் மாம்பழங்கள் கொள்முதல் செய்வாா்கள்.
மாவட்ட நிா்வாகம், மா கொள்முதல், அரவை பணி உள்ளிட்ட அனைத்து பணிகளையும் கண்காணித்து வருகிறது. கடந்த ஆண்டு வறட்சியால் பாதிக்கப்பட்ட பாதிக்கப்பட்ட 668 மா விவசாயிகளுக்கு இழப்பீடு வழங்கப்படும். மா விவசாயிகளின் துயரை துடைக்கும் அரசாக திமுக அரசு உள்ளது.
2018 ஆம் ஆண்டு இதேபோன்ற சூழலில் அப்போதைய அதிமுக அரசு மா விவசாயிகளுக்கு ஆதரவாக எந்த நடவடிக்கையும் எடுக்கவில்லை. அப்போதே ஆந்திர அரசு மா விவசாயிகளுக்கு கிலோ ஒன்றுக்கு ரூ.2.50 மானியம் வழங்கியது. ஆனால், தற்போது அரசியலுக்காக விவசாயிகள் மீது அக்கறை காட்டுவதுபோல அதிமுக நாடகமாடுகிறது என்றாா்.
படவிளக்கம் (26கேஜிபி6):
தே.மதியழகன்.
