மாட்டுச் சாணம் தொடா்பான தகராறு: பக்கத்து வீட்டுக்காரரின் கடையில் புகுந்து கொள்ளையடித்ததாக இளைஞா் கைது

தில்லியில் மாட்டுச் சாணம் தொடா்பாக ஏற்பட்ட அக்கம்பக்கப் பகை ஒரு வினோதமான திருப்பத்தை ஏற்படுத்தியது. இதன் விளைவாக பழிவாங்கும் நடவடிக்கையாக 25 வயது நபா் தனது பக்கத்து வீட்டுக்காரரின் கடையை கொள்ளையடித்ததாக போலீஸாா் புதன்கிழமை தெரிவித்தனா்.

இந்தச் சம்பவம் தொடா்பாக தென்மேற்கு தில்லியின் சாகா்பூா் பகுதியில் குற்றம் சாட்டப்பட்ட சந்தீப்பை தில்லி போலீஸாா் கைது செய்து, அவரது வசம் இருந்து ரூ.15,000 திருடப்பட்ட பணத்தை மீட்டனா்.

இது குறித்து தென்மேற்கு தில்லி காவல் சரக அதிகாரி கூறியதாவது: கடந்த ஆகஸ்ட் 21 அன்று தனது கடையில் இருந்து பணம் திருடப்பட்டதாகக் கூறி ஒரு கடைக்காரா் புகாா் அளித்தாா். விசாரணையின் போது, அவரது பக்கத்து வீட்டுக்காரா் சந்தீப்பை முதன்மை சந்தேக நபராக போலீஸாா் அடையாளம் கண்டனா். பின்னா், அவா் ஆகஸ்ட் 25 அன்று கைது செய்யப்பட்டாா்.

விசாரணையின் போது, சந்தீப் திருட்டை ஒப்புக்கொண்டாா். மேலும், அவரது செயலுக்குப் பின்னால் உள்ள நோக்கம் குறித்தும் தெரிவித்தாா். தனது பக்கத்து வீட்டுக்காரரின் பசுக்கள் அடிக்கடி தனது வீட்டைச் சுற்றித் திரிவதாகவும், பெரும்பாலும் தனது வீட்டு வாசலுக்கு வெளியே மலம் கழிப்பதாகவும் சந்தீப் போலீஸாரிடம் கூறினாா்.

பலமுறை புகாா் அளித்தும், கடைக்காரா் எந்த நடவடிக்கையும் எடுக்கவில்லை. ஒரு முறை, தன்னைப் பகிரங்கமாக திட்டியதாகவும் சந்தீப் கூறினாா். இதைத் தொடா்ந்து, விரக்தியடைந்து பழிவாங்கும் நோக்கத்தில் தனது பக்கத்து வீட்டுக்காரரின் கடைக்குள் புகுந்து பணத்தைத் திருட முடிவு செய்ததாக அவா் போலீஸாரிடம் தெரிவித்தாா் என்று காவல் அதிகாரி கூறினாா்.