மதுரை மாநகரக் காவல் துறை சாா்பில் நடைபெற்ற பொங்கல் விழாவில் மாநகரக் காவல் ஆணையா் ஜெ.லோகநாதன் பங்கேற்றாா்.
மதுரை மாநகர காவல் துறை சாா்பில், காவலா் குடும்பங்களுக்கான பொங்கல் விழா வியாழக்கிழமை மாலை நடைபெற்றது. மதுரை மாநகர ஆயுதப் படை மைதானத்தில் நடைபெற்ற இந்த விழாவுக்கு மாநகரக் காவல் ஆணையா் ஜெ. லோகநாதன் தலைமை வகித்தாா். காவல் துணை ஆணையா்கள் இனிகோ திவ்யன், அனிதா, ராஜேஸ்வரி, வனிதா, கூடுதல் துணை ஆணையா் திருமலைக்குமாா், உதவி ஆணையா்கள், ஆய்வாளா்கள் உள்ளிட்டோா் குடும்பத்துடன் பங்கேற்றனா்.
விழாவில் தனது குடும்பத்தினருடன் பங்கேற்ற ஆணையா் மைதானத்தின் நடுவே அலங்கரிக்கப்பட்டு வைத்திருந்த கிராமியக் குடிலில் விளக்கேற்றி விளையாட்டுப் போட்டிகளைத் தொடங்கிவைத்தாா். இதையடுத்து, கோலப் போட்டி, கயிறு இழுக்கும் போட்டி, குழந்தைகளுக்கான போட்டிகள் உள்பட பல்வேறு போட்டிகள் நடைபெற்றன.
இதைத்தொடா்ந்து, இரவு நடைபெற்ற பரிசளிப்பு விழாவில் காவல் ஆணையா் பங்கேற்று, வெற்றி பெற்றவா்களுக்கு பரிசுகள் வழங்கினாா்.
