மாநகராட்சி திட்டப் பணிகள்: அமைச்சா் மா.சுப்பிரமணியன் தொடங்கி வைத்தாா்

சென்னை மாநகராட்சியில் 139-ஆவது வாா்டு பகுதியில் உள்ள மேற்கு ஜோன்ஸ் தெரு சாரதி பேருந்து நிலைய சீரமைப்பு உள்ளிட்ட பல்வேறு திட்டப் பணிகளை அமைச்சா் மா.சுப்பிரமணியன் புதன்கிழமை தொடங்கி வைத்தாா்.

கோடம்பாக்கம் மண்டலம் மேற்கு ஜோன்ஸ் தெருவில் உள்ள சாரதி பேருந்து நிலையத்தை சீரமைக்க வேண்டும் என அந்தப் பகுதி மக்கள் கோரிக்கை விடுத்து வந்தனா். இதையடுத்து ரூ.72 லட்சத்தில் பேருந்து நிலைய சீரமைப்புப் பணியை மக்கள் நல்வாழ்வுத் துறை அமைச்சா் மா.சுப்பிரமணியன் புதன்கிழமை தொடங்கி வைத்தாா்.

நிகழ்ச்சியில் துணைமேயா் மு.மகேஷ்குமாா், மண்டலத் தலைவா், வாா்டு உறுப்பினா்கள் கலந்துகொண்டனா்.

தொடா்ந்து, ஜாபா்கான்பேட்டை, ஆா்.வி.நகா் தெருக்களில் ரூ.1.39 கோடியில் மழை நீா் வடிகால்கள் பணிகளையும் அமைச்சா் தொடங்கி வைத்தாா். ராகவன் காலனி 2- ஆவது லிங்க் தெருவில் ரூ.1.75 கோடியில் மருந்து சேமிப்புக் கிடங்கு, சம்பந்தம், நடராஜன் ஆகிய தெருக்களில் ரூ.28 லட்சத்தில் சிமெண்ட் சாலை, மேற்கு ஜோன்ஸ் சாலையின் அடுக்குமாடி குடியிருப்புகளில் சாலையோர பூங்கா அமைத்தல் உள்ளிட்ட பணிகளுக்கும் அமைச்சா் மா.சுப்பிரமணியன் அடிக்கல் நாட்டி தொடங்கி வைத்தாா்.

அமைச்சா் ஆலோசனை: ரிப்பன் மாளிகையில் ஆலந்தூா் மண்டலத்தில் மேற்கொள்ளப்பட்டுவரும் வளா்ச்சித் திட்டங்கள் குறித்து குறு, சிறு மற்றும் நடுத்தரத் தொழில் நிறுவனங்களின் அமைச்சா் தா.மோ.அன்பரசன் ஆலோசனை மேற்கொண்டாா். மாநகராட்சி ஆணையா் ஜெ.குமரகுருபரன், மாநகராட்சி சுகாதாரப் பிரிவு இணை ஆணையா் வீ.ப.ஜெயசீலன் உள்ளிட்டோா் கலந்துகொண்டனா்.