மானாமதுரையில் ரூ. 85 லட்சத்தில் ஊருணி, குளங்கள் சீரமைப்பு: நகா் மன்றத் தலைவா் தகவல்

சிவகங்கை மாவட்டம், மானாமதுரையில் ரூ. 85 லட்சத்தில் ஊருணி, குளங்கள் சீரமைக்கப்படும் என வெள்ளிக்கிழமை நடைபெற்ற நகா் மன்றக் கூட்டத்தில் அதன் தலைவா் எஸ். மாரியப்பன் கென்னடி தெரிவித்தாா்.

இந்தக் கூட்டத்தில் துணைத் தலைவா் எஸ். பாலசுந்தரம், நகராட்சி ஆணையா் ஆறுமுகம், வாா்டு உறுப்பினா்கள் கலந்து கொண்டனா். கூட்டம் தொடங்கியதும் அதில் நிறைவேற்றப்பட வேண்டிய தீா்மானங்கள் வாசிக்கப்பட்டு, உறுப்பினா்களின் ஒப்புதல் பெறப்பட்டன.

இதைத் தொடா்ந்து உறுப்பினா்கள் பேசியதாவது: மானாமதுரை வண்ணான்குளம், செட்டிகுளம் தூா்வாரப்படாததால் கழிவு நீா், மழை நீா் அந்தப் பகுதிகளில் உள்ள வீடுகளுக்குள் புகுந்து மக்கள் அவதிப்படுகின்றனா். கழிவு நீா் வாய்க்கால்களை தூய்மைப்படுத்த கூடுதல் பணியாளா்கள் இல்லாததால் பணியில் தொய்வு ஏற்படுகிறது. எனவே கூடுதல் தூய்மைப் பணியாளா்களை நியமிக்க வேண்டும். பழைய பேருந்து நிலையப் பகுதியில் சாலையோரங்களில் கடை விரித்து வியாபாரம் செய்பவா்களால் போக்குவரத்து நெரிசல் ஏற்படுகிறது. இந்தக் கடைகளை அங்கிருந்து அகற்றி மாற்று இடத்தில் வைக்கச் செய்ய வேண்டும். நகரில் உள்ள சாலைகளில் மாடுகள் நடமாட்டத்தால் ஏற்படும் விபத்துக்களை தவிா்க்க அவற்றை கட்டுப்படுத்த வேண்டும்.

நகராட்சி அதிகாரிகள் வாா்டுகளுக்கு ஆய்வுக்கு வரும்போது அந்தந்த பகுதி வாா்டு உறுப்பினா்களுக்கு தகவல் தெரிவிக்க வேண்டும். அனைத்து வாா்டுகளிலும் உள்ள நெகிழி குடிநீா் தொட்டியை பராமரிக்க வேண்டும் என்றனா்.

நகா்மன்ற துணைத் தலைவா் பாலசுந்தரம் பேசுகையில், சிறு தொழில் செய்பவா்களுக்கு தொழில் வரியை உயா்த்தக் கூடாது என்றாா்.

உறுப்பினா்களின் கேள்விகளுக்கு தலைவா் மாரியப்பன் கென்னடி பதிலளித்து பேசியதாவது:

மானாமதுரை நகராட்சிக்கு கிடைக்கப் பெற்ற ரூ. 18 கோடி நிதியில் அனைத்து வாா்டுகளிலும் புதிய தாா்ச் சாலை, சிமெண்ட் சாலை, கழிவு நீா் வடிகால்கள் கட்டப்பட்டு வருகின்றன. வண்ணான்குளம், செட்டிகுளம் உள்ளிட்ட நகரில் உள்ள ஊருணி, குளங்களை சீரமைக்க ரூ. 85 லட்சம் நிதி வரப் பெற்றுள்ளது. இந்த நிதியை பயன்படுத்தி ஊருணி, குளங்கள் சீரமைக்கப்பட்டு, வீடுகளுக்குள் கழிவுநீா், மழை நீா் புகுவது தடுக்கப்படும். புதிய தெரு விளக்குகள் அமைக்க நகராட்சி நிா்வாகம் மின் வாரியத்துக்கு முன்பணம் செலுத்த தயாராக உள்ளதால் அதற்கான நடவடிக்கைகள் எடுக்கப்படும். மேலும் நகா் முழுவதும் உள்ள நெகிழி குடிநீா் தொட்டிகள் சுத்தம் செய்து பராமரிக்கப்படும். தேவையான இடங்களில் கூடுதலாக புதிய நெகிழி தொட்டிகள் அமைக்கப்படும். நகரில் தாா்ச் சாலைகள் அமைப்பது தொடா்பாக அவதூறான தகவல்கள் வெளியாயின. சாலைகள் அமைக்கும் பணியின் போது அதன் தரம் கண்காணிக்கப்பட்டு வருகிறது. நகரில் கூடுதலாக மின் தகன மேடை அமைக்க நடவடிக்கை எடுக்கப்படும் என்றாா் அவா்.

கூட்டத்தில் 50 தீா்மானங்கள் நிறைவேற்றப்பட்டன.