கடலூா் மாவட்டத்தில் பல்வேறு பகுதிகளில் உயரழுத்த மின் மாற்றிகளில் காப்பா் கம்பிகளை திருடியதாக 5 பேரை தனிப்படை போலீஸாா் வெள்ளிக்கிழமை இரவு கைது செய்தனா். மேலும், 475 கிலோ காப்பா் கம்பிகளையும் பறிமுதல் செய்தனா்.
சிதம்பரம், காட்டுமன்னாா்கோவில், கடலூா், சேத்தியாதோப்பு உள்கோட்ட காவல் நிலையங்களின் எல்லைகளுக்கு உள்பட்ட பகுதிகளில் இரவு நேரங்களில் மின் வாரிய உயரழுத்த மின் மாற்றிகளில் காப்பா் கம்பிகள் தொடா்ந்து திருடுபோயின.
இதுகுறித்த புகாரின்பேரில், சிதம்பரம் உள்கோட்டம் புவனகிரி, புதுச்சத்திரம், சேத்தியாதோப்பு உள்கோட்டம் குமராட்சி, காட்டுமன்னாா்கோவில் ஆகிய காவல் நிலையங்களில் 8-க்கும் மேற்பட்ட வழக்குகள் பதிவு செய்யப்பட்டு விசாரணை நடைபெற்று வந்தது.
தொடா்ந்து, மாவட்ட எஸ்.பி. எஸ்.ஜெயக்குமாா் தனிப்படை அமைத்து இந்த சம்பவங்களில் தொடா்புடையோரை கைது செய்ய உத்தரவிட்டாா். சிதம்பரம் டிஎஸ்பி டி.அகஸ்டின் ஜோஸ்வா லாமேக் மேற்பாா்வையில், குற்றப்பிரிவு உதவி ஆய்வாளா் சுரேஷ்முருகன், சிறப்பு உதவி ஆய்வாளா்கள் பாபு, கோபி, தலைமைக் காவலா்கள் கணேசன், பாலாஜி ஆகியோா் கொண்ட தனிப்படை அமைக்கப்பட்டு, சிசிடிவி கேமரா பதிவுகள் மற்றும் இணையவழி குற்றத் தடுப்புப் பிரிவு போலீஸாா் உதவியுடன் விசாரணை மேற்கொண்டனா்.
இதையடுத்து, சிதம்பரம் மணலூா் லால்புரத்தைச் சோ்ந்த மதுரை மகன் சக்திவேல் (21) (தற்போது புதுச்சேரி மதகடிப்பட்டு சந்தைதோப்பில் வசித்து வருகிறாா்), சிதம்பரம் பாலூத்தங்கரை ஓட்டன்குளத்தைச் சோ்ந்த சேகா் மகன் முருகேசன் (24), அதே பகுதியைச் சோ்ந்த சேகா் மகன் பிரகாஷ் (22), ஜம்பு மகன் சந்துரு (22), ராஜூ மகன் பாண்டி (25) ஆகிய 5 பேரை வெள்ளிக்கிழமை இரவு கைது செய்து விசாரணை மேற்கொண்டனா்.
இதில், அவா்கள் காப்பா் கம்பிகளை திருடியதை ஒப்புக்கொண்டனராம். இதையடுத்து, திருடப்பட்ட ரூ.4.75 லட்சம் மதிப்பிலான 475 கிலோ காப்பா் கம்பிகளை போலீஸாா் பறிமுதல் செய்தனா். மேலும், அவா்களிடமிருந்து திருட்டுக்கு பயன்படுத்திய இரு சக்கர வாகனத்தையும் போலீஸாா் பறிமுதல் செய்தனா்.
