‘மீட்பர்’ ஆனந்த் அம்பானியால் ‘காப்பாற்றப்பட்ட’ பிராய்லர் கோழிகள் இப்போது எங்கே?

ரிலையன்ஸ் நிறுவனத் தலைவர் முகேஷ் அம்பானியின் இளைய மகன் ஆனந்த் அம்பானி பிராய்லர் கோழிகளை சாவிலிருந்து ‘மீட்ட’ சம்பவம்தான் தற்போது சமூக வலைதளங்களில் அதிரிபுதிரி ஹாட் டாபிக்.

தனது 30-வது பிறந்தநாளை முன்னிட்டு கிருஷ்ணரின் ஆசிகளைப் பெறுவதற்காக குஜராத்தின் ஜாம்நகரில் இருந்து துவாரகாவுக்கு பாதயாத்திரையாக சென்ற அவர், தனது பயணத்தின் நடுவில், பிராய்லர் கோழிகளை கறிக்கடைகளுக்கு ஏற்றிச் சென்ற லாரியை மடக்கிப் பிடித்து இந்த கோழிகளை காப்பாற்றியுள்ளார்(?).

இது தொடர்பாக சமூக வலைதளங்களில் வைரலாக பரவி வரும் வீடியோவில் தனது உதவியாளர்களிடம் கோழிகளுக்கான தொகையை உரிமையாளரிடம் கொடுத்துவிட்டு கோழிகளை எடுத்து வருமாறு கட்டளையிடுகிறார்.

அம்பானியும் விலங்குகளும்

வந்தாரா (வன நட்சத்திரம்) என்ற பெயர் கொண்ட விலங்குகள் மறுவாழ்வு மையத்தை ஆனந்த் அம்பானி நிர்வகித்து வருகிறார். ஜாம் நகரில் 3000 ஏக்கர் பரப்பளவில் பரந்து விரிந்த இந்த வந்தாராவில் காட்டுயிர்களுக்கான மருத்துவமனைகள், பயிற்சி மையங்கள், மிருகக் காட்சி சாலைகள் உள்ளிட்ட ஏராளமான அமைப்புகள் செயல்பட்டு வருகின்றன.

தான் 12 வயதாக இருக்கும்போது ஜெய்ப்பூரில் இருந்து ரன்தம்போருக்கு சாலை மார்க்கமாக செல்கையில் சுட்டெரிக்கும் வெயிலில் நடந்து செல்லும் யானைக் குட்டிகளை பார்த்து தான் வேதனையடைந்தாகவும், அதுவே வந்தாரா உருவாக அடித்தளமாக அமைந்தது என்றும் ஆனந்த் அம்பானி குறிப்பிடுகிறார்.

இங்கிருக்கும் மிருகக் காட்சிசாலையில், போட்ஸ்வானாவிலிருந்து கொண்டு வரப்பட்ட சிங்கங்கள், இந்தியாவைச் சேர்ந்த புலிகள் உள்ளிட்ட ஏராளமான மாமிச உண்ணிகள் என 2000-க்கும் மேற்பட்ட காட்டு விலங்குகள் உள்ளன. இந்த விலங்குகளுக்கு என்ன உணவளிக்கப்படுகிறது என்று தெரியவில்லை. நிச்சயமாக ஜாம் நகரில் ஆனந்த் அம்பானி ‘மீட்ட’ அந்த கோழிகளாக இருக்காது என்று நம்புவோம்.

இன்னொரு புறம் இந்தச் சம்பவத்தை வட இந்தியாவில் ‘கோழிகளுக்கு விடுதலையை பரிசளித்த ஆனந்த் அம்பானி’, ‘கோழிகளின் இருண்ட தலைவிதிக்கு முடிவு’ என்றெல்லாம் புகழ்ந்து தள்ளிவருகின்றனர். ஏற்கெனவே குஜராத் உள்ளிட்ட வடமாநிலங்களில் மாட்டிறைச்சி அல்லது மாடுகளை ஏற்றிச் செல்லும் வாகனங்கள் தாக்கப்படும் சம்பவங்கள் அவ்வப்போது காதுகளில் விழுந்தாலும் ஒருபோதும் கோழிகளை யாரும் தடுத்து நிறுத்தியதாக நாம் கேள்விப்பட்டதில்லை. இனி அது போன்ற சம்பவங்கள் நடக்கலாம் என்பதற்கான தொடக்கமாகவே இந்த சம்பவத்தை பார்க்க வேண்டியிருக்கிறது.

நாடு முழுவதும் உணவு தேவைக்காக கோடிக்கணக்கான கோழிகள் கொல்லப்படுகின்றன. இந்தியாவில் கோழிப்பண்ணை தொழில் என்பது ஒரு பரந்து விரிந்த சந்தை. இந்தியா முழுவதும் 1.5 முதல் 2 மில்லியன் சில்லறை கோழி விற்பனையாளர்கள் செயல்படுவதாக மதிப்பிடப்பட்டுள்ளது.

இப்படி பலரது வாழ்வாதாரத்தை நிர்ணயிக்கக் கூடிய ஒரு தொழிலை இந்தச் சம்பவத்தை முன்னுதாரணமாகக் கொண்டு பலரும் கோழிகளை ‘மீட்க’ கிளம்பினால் என்னவாகும்?

ஜாம்நகர் ஒரு தொழில்கள் புழங்கும் பகுதி. அங்கிருக்கும் மக்கள் இதற்கு முன்பு கோழிகள் கறிக்காக கொல்லப்படுவது குறித்து புகார் அளித்தாக ஏதேனும் தரவுகள் உள்ளதா? அங்கு கோழிகளை மீட்க வேண்டிய திடீர் அவசியம் எழுந்தது ஏன் என்ற கேள்வி எழாமல் இல்லை.

ஆனந்த் அம்பானி மீட்டதாக சிலாகிக்கப்படும் பிராய்லர் கோழிகள் முழுக்க முழுக்க இறைச்சிக்காக உருவாக்கப்படுபவை. நாட்டுக் கோழி, ஆட்டிறைச்சி வாங்கி உண்ணமுடியாத பலரது தேர்வும் பிராய்லர் கோழியாகத் தான் இருக்கும். அது மட்டுமின்றி தெருவோரக் கடைகள் முதல் நட்சத்திர விடுதிகள் வரை பிராய்லர் கோழிகளே பிரதான உணவாக இருக்கிறது. இப்படியான சூழலில் இவற்றை காப்பாற்றுவதாக கூறி நடத்தப்பட்ட இந்த நிகழ்வை ‘பிஆர்’ உத்தி என்று சொல்வது நியாயம்தானே?

அந்த வீடியோவில் கோழி ஒன்றை கையில் ஏந்தியபடி கடவுளின் பெயரையும் உரக்க உச்சரிக்கிறார் அம்பானியின் மகன். இதன் மூலம் தனது செயலுக்கு ஆன்மிக சாயம் பூச நினைக்கிறாரா என்ற சந்தேகமும் எழாமல் இல்லை.

கடந்த சில ஆண்டுகளாக விலங்குகளின் திடீர் காவலராக தன்னை காட்டிக் கொள்ளும் ஆனந்த் அம்பானி, தனது திருமண நிகழ்வின் போது சுமார் ரூ.36 லட்சம் மதிப்புள்ள முதலையின் தோலில் இருந்து செய்யப்பட்ட சிவப்பு நிற லெதர் ஜாக்கெட்டை அணிந்திருந்தார் என்பது எவ்வளவு பெரிய நகை முரண்.

ரிலையன்ஸ் ஃப்ரெஷ், ஜியோமார்ட் உள்ளிட்ட நிறுவனங்களில் அசைவ உணவு வகைகள், லெதர் ஜாக்கெட், பெல்ட்டுகள் விற்கப்படுவதில்லையா? அவற்றில் விற்கப்படும் சிக்கன், மட்டன் மசாலாக்கள் ஒருவேளை காய்கறிகளை சமைப்பதற்காக இருக்கலாம்.

இந்த ‘கோழி மீட்பு’ சம்பவம், இதுவரை பெரும் பணக்காரராக, ஆடம்பர பிரியராக மீடியாக்களில் காட்டப்பட்ட ஆனந்த் அம்பானியை ஒரு தாராளபிரபுவாக கட்டமைக்கும் ஒரு முயற்சியின் தொடக்கமாகவே தெரிகிறது. தாங்கள் மீட்கப்பட்டோமோ இல்லை ‘பிஆர்’ விளம்பரங்களுக்காக கடத்தப்பட்டோமோ என்று ஒரு நிமிடம் அந்த கோழிகளுக்கே தலைசுற்றியிருக்கலாம்.

அந்த கோழிகளுக்கு என்னவானது என்ற கேள்விகள் சமூக வலைதளங்களில் துளைத்தெடுக்கப்படுவதால், விரைவில் அவை வந்தாராவின் புல்வெளிகளில் மகிழ்ச்சியோடு சுற்றித் திரிவதாக ஒரு வீடியோ விரைவில் வெளியிடப்படும் என்று எதிர்பார்க்கலாம் அல்லது பாதயாத்திரை செல்லும் வழியில் இறைச்சிக்காக கொண்டு செல்லப்பட்ட மாடுகள் அல்லது ஆடுகளை மீட்ட ஆனந்த் அம்பானி என்ற புதிய செய்தியின் மூலம் அவை மறக்கப்படிக்கப்படலாம்.