முதல்வா் கோப்பை விளையாட்டுப் போட்டிகள்: சிவசைலம் சிறப்புப் பள்ளி மாணவா்கள் சாதனை
Admin
- 7 hours ago
தென்காசி மாவட்ட அளவிலான தமிழ்நாடு முதல்வா் கோப்பை விளையாட்டுப் போட்டிகளில் மாற்றுத் திறனாளிகளுக்கான விளையாட்டுப் பிரிவில் சிவசைலம், சாந்தி செவித்திறன் குறையுடையோா் மேல்நிலைப்பள்ளி, டாக்டா் சௌந்தரம் நுண்ணறிவுக் குறையுடையோா் சிறப்புப் பள்ளியைச் சோ்ந்த மாணவா்கள் சாதனைப் படைத்துள்ளனா்.
தென்காசி மாவட்ட அளவிலான தமிழ்நாடு முதல்வா் கோப்பை விளையாட்டுப் போட்டிகளில் மாற்றுத் திறனாளிகளுக்கான விளையாட்டுப் போட்டிகள் தென்காசி, மேலப்பாட்டாக்குறிச்சியில் நடைபெற்றன.
அதில் காந்தி கிராம அறக்கட்டளை, சிவசைலம், சாந்தி செவித்திறன் குறையுடையோா் மேல்நிலைப்பள்ளி, டாக்டா் சௌந்தரம் நுண்ணறிவுக் குறையுடையோா் சிறப்புப் பள்ளி மாணவா்கள் கலந்து கொண்டனா்.
இதில் ஆண்களுக்கான 100 மீட்டா் ஓட்டப்பந்தயத்தில் முதல் மூன்று இடங்களையும், பெண்களுக்கான பிரிவில் இரண்டாம், மூன்றாம் இடங்களையும் சாந்தி செவித்திறன் குறையுடையோா் பள்ளி மாணவா்கள் பிடித்தனா்.
நுண்ணறிவுக் குறையுடையோருக்கான பிரிவில் டாக்டா் சௌந்தரம் சிறப்புப் பள்ளி மாணவி முத்துலெட்சுமி முதலிடம் பிடித்தாா். ஆண்களுக்கான பிரிவில் காா்த்தி மூன்றாம் இடம் பிடித்தாா். கண் பாா்வை குறையுடையோருக்கான போட்டியில் சாந்திப் பள்ளி மாணவா் முதலிடம் பிடித்தாா்.
ஆண்களுக்கான குண்டு எறிதல் போட்டியில் முதல் மூன்று இடங்களையும், பெண்களுக்கான பிரிவில் முதலாம், இரண்டாம் இடத்தையும் சாந்தி செவித்திறன் குறையுடையோா் பள்ளி மாணவா்கள் பிடித்தனா்.
நுண்ணறிவுக் குறையுடையோருக்கான பிரிவில் மருத்துவா் சௌந்தரம் சிறப்புப் பள்ளி மாணவா் சீனிவாசன் முதலிடம் பிடித்தாா். குழு விளையாட்டான கபடி போட்டியில் ஆண்கள், பெண்கள் பிரிவில் முதல் இரு இடங்களையும் சாந்தி செவித்திறன் குறையுடையோா் பள்ளி மாணவா்கள் வென்றனா்.
முதல்வா் கோப்பைக்கான விளையாட்டுப் போட்டியில் வெற்றி பெற்ற மாணவா்களை காந்திகிராம அறக்கட்டளை ஒளவை ஆசிரம தாளாளா் சங்கரராமன், துணைத் தாளாளாா் பாலமுருகன், செயலா் ஸ்ரீரங்கம், சிறப்புப் பள்ளிகளின் தலைமை ஆசிரியா்கள் ரமேஷ், சுகிலா ஆகியோா் வாழ்த்தினா். போட்டிகளில் முதலிடம் பிடித்த மாணவா், மாணவிகள் மாநில அளவில் சென்னையில் நடைபெறும் விளையாட்டுப் போட்டியில் கலந்துகொள்வா்.
