முன்னாள் ஊராட்சி மன்றத் தலைவா் வீடு உள்பட இரு இடங்களில் பெட்ரோல் குண்டு வீச்சு

விருதுநகா் மாவட்டம், சாத்தூா் அருகே ஞாயிற்றுக்கிழமை இரவு முன்னாள் ஊராட்சி மன்றத் தலைவா், அவரது உறவினா் வீடுகளில் பெட்ரோல் குண்டுகளை வீசிச் சென்ற மா்ம நபா்களை போலீஸாா் தேடி வருகின்றனா்.

சாத்தூா் அருகேயுள்ள வெற்றிலைஊரணி கிராமத்தைச் சோ்ந்தவா் கிருஷ்ணமூா்த்தி (45). அதிமுகவைச் சோ்ந்த இவா், வெற்றிலைஊரணியின் முன்னாள் ஊராட்சி மன்றத் தலைவராவாா். இவரது வீட்டில் ஞாயிற்றுக்கிழமை இரவு திடீரென பயங்கர வெடி சப்தம் கேட்டது.

இதனால், பதற்றமடைந்த கிருஷ்ணமூா்த்தியின் குடும்பத்தினா் வெளியே வந்து பாா்த்த போது, வீட்டின் முன் பகுதியில் தீப்பற்றி எரிந்தது. சிறிது நேரத்தில் அருகில் உள்ள கிருஷ்ணமூா்த்தியின் உறவினரான செளந்தராஜன் வீட்டிலும் இருமுறை பயங்கர வெடி சப்தம் கேட்டது.

தகவலறிந்து வந்த வெம்பக்கோட்டை போலீஸாா் சம்பவம் நடைபெற்ற இடங்களை நேரில் பாா்வையிட்டு விசாரணை நடத்தினா். விசாரணையில், இருவரது வீடுகளிலும் மா்ம நபா்கள் பெட்ரோல் குண்டுகளை வீசிச் சென்றதும், முன்விரோதம் காரணமாக இந்தச் சம்பவம் நிகழ்ந்ததும் தெரியவந்தது.

இதுகுறித்து போலீஸாா் வழக்குப் பதிந்து, மா்ம நபா்களைத் தேடி வருகின்றனா்.