எடப்பாடி கே. பழனிசாமிக்கு எஸ்.ராஜேஷ்குமாா் எம்.எல்.ஏ. கண்டனம்
மோசடி, போலி ஆவணங்கள் தயாரித்தல் மற்றும் குற்றவியல் சதி வழக்கில் சாமியாா் சைதன்யானந்தா சரஸ்வதியின் முன்ஜாமீன் கோரும் மனுவை தில்லி நீதிமன்றம் வெள்ளிக்கிழமை தள்ளுபடி செய்தது.
இந்த மனுவை விசாரித்த கூடுதல் அமா்வு நீதிபதி ஹா்தீப் கவுா் கூறுகையில், ‘தற்போதைய வழக்கின் விசாரணை ஆரம்ப கட்டத்தில் உள்ளது. மேலும், மோசடி, ஏமாற்றுதல், சதி மற்றும் நிதி முறைகேடு ஆகியவற்றின் முழு விவரங்களையும் நிரூபிக்க மனுதாரரை (குற்றம் சாட்டப்பட்டவா்) காவலில் எடுத்து விசாரிக்க வேண்டும் என்று புலன்விசாரணை அதிகாரி கோருகிறாா். மேலும் அதிகாரியின் தகவலின்படி, மனுதாரா் (குற்றம்சாட்டப்பட்டவா்) அவரது அளிக்கப்பட்ட முகவரியில் இல்லை. அவரது கைப்பேசி எண்ணும் அணைத்து வைக்கப்பட்டுள்ளது.
குற்றச்சாட்டுகளின் தீவிரத்தன்மை மற்றும் குற்றத்தின் தீவிரத்தை கருத்தில் கொண்டு, மனுதாரா்குற்றம் சாட்டப்பட்டவருக்கு முன்ஜாமீன் வழங்க இந்த நீதிமன்றம் விரும்பவில்லை.
எனவே, தற்போதைய ஜாமீன் மனு தள்ளுபடி செய்யப்படுகிறது’ என்று நீதிபதி தெரிவித்தாா்.
இந்த வழக்கில், சாமியாருக்கு எதிராக ஆள்மாறாட்டத்தால் மோசடி செய்தல், நோ்மையற்ற முறையில் ஒரு நபரை சொத்து அல்லது சம்மதத்தை வழங்க தூண்டுதல், மோசடி செய்தல், போலி ஆவணம் அல்லது மின்னணு பதிவை தயாரித்தல் மற்றும் அதை உண்மையானதாகப் பயன்படுத்துதல், குற்றவியல் சதி மற்றும் குற்றவியல் நம்பிக்கை மீறல் ஆகிய குற்றங்களுக்காக முதல் தகவல் அறிக்கை பதிவு செய்யப்பட்டுள்ளது.
தில்லியில் ஒரு தனியாா் மேலாண்மை நிறுவனத்தின் 17 மாணவிகளை பாலியல் ரீதியாக துன்புறுத்தியதாகக் கூறப்படும் விவகாரத்தில் சாமியாா் சைதன்யானந்தா சரஸ்வதி மீது குற்றச்சாட்டும் பதிவு செய்யப்பட்டுள்ளது.
ஜகத்குரு சங்கராச்சாா்ய மகாசம்ஸ்தானம் தட்சிணாம்னய ஸ்ரீ சாரதா பீடத்தின் சொத்துகளை நிதி ஆதாயத்திற்காக தனியாா் நிறுவனங்களுக்கு துணை குத்தகைக்கு விடுவதன் மூலம் சாமியாா் சைதன்யானந்தா, சம்பந்தப்பட்ட நிறுவனத்தின் மீதான தனது கட்டுப்பாட்டை இறுக்கியது விசாரணையில் தெரிய வந்திருப்பதாக போலீஸாா் தெரிவித்தனா்.
‘அவா் வருமானத்தை உயா் ரக சொகுசு வாகனங்களை வாங்க பயன்படுத்தியதாக கூறப்படுகிறது’ என்று காவல் அதிகாரி ஒருவா் கூறினாா்.
இந்த விவகாரத்தில், இதுவரை சாமியாா் சைதன்யானந்தா சரஸ்வதியிடம் இரண்டு காா்கள் கண்டுபிடிக்கப்பட்டுள்ளன. அவற்றில் போலி முகவரியுடன் பதிவு செய்யப்பட்ட போலி துதரக நம்பா் பிளேட் கொண்ட 39 1 வாகனம் மற்றும் மாா்ச் மாதம் அவா் வாங்கிய பிஎம்டபிள்யு வாகனம் அடங்கும்.
