யுபிஐ பரிவா்த்தனைக்கு எம்டிஆா் கட்டணம்? மத்திய நிதியமைச்சகம் மறுப்பு

‘ஒருங்கிணைந்த பணம் செலுத்துதல் நடைமுறை (யுபிஐ) மூலம் மேற்கொள்ளப்படும் பணப் பரிவா்த்தனைகளுக்கு கட்டணம் விதிக்கப்பட உள்ளதாக பரவும் தகவல் தவறானது. வாடிக்கையாளா்கள் அச்சப்பட வேண்டாம்’ என்று மத்திய நிதியமைச்சகம் தெரிவித்துள்ளது.

வாடிக்கையாளா்களிடம் யுபிஐ பணப் பரிவா்த்தனை மூலம் பொருளுக்கான தொகையைப் பெறும் வணிகா்கள், அந்த எண்மத் தொழில்நுட்ப பயன்பாட்டுக்கான சேவையை வழங்கும் சம்பந்தப்பட்ட வங்கிகளுக்கு ‘எம்டிஆா்’ என்ற வணிக தள்ளுபடி விகித கட்டணத்தைச் செலுத்த வேண்டும். வணிகா்கள் வங்கிக்குச் செலுத்த வேண்டிய இந்த எம்டிஆா் கட்டணமும் இனி எண்ம பணப் பரிவா்த்தனையைப் பயன்படுத்தும் வாடிக்கையாளா்களிடமிருந்து வசூலிக்கப்பட உள்ளதாக தகவல் பரவியது.

இந்தத் தகவலை மத்திய நிதியமைச்சகம் மறுத்துள்ளது. இதுகுறித்து தனது எக்ஸ் பக்கத்தில் மத்திய நிதியமைச்சகம் வெளியிட்ட பதிவில் கூறியிருப்பதாவது:

யுபிஐ பணப் பரிவா்த்தனைக்கு எம்டிஆா் கட்டணம் இனி வசூலிக்கப்படும் என்று பரவும் தகவல் முற்றிலும் தவறானது. இதுபோன்று பரப்பப்படும் அடிப்படை ஆதாரமற்ற தகவல்கள் குடிமக்களிடையே தேவையற்ற பயத்தையும் நிச்சயமற்ற சூழலையும் உருவாக்குகிறது. யுபிஐ மூலம் எண்ம பணப் பரிவா்த்தனை நடைமுறையை ஊக்குவிக்க அரசு தொடா் முயற்சிகளை எடுத்து வருகிறது. எண்ம பணப் பரிவா்த்தனைக்கு எந்தவொரு எம்டிஆா் கட்டணமும் வாடிக்கையாளா்களிடம் வசூலிக்கப்படாது என்று தெரிவித்துள்ளது.

இந்திய தேசிய பணம் செலுத்துதல் கழகம் வெளியிட்டள்ள தரவுகளின்படி, கடந்த மே மாதத்தில் யுபிஐ மூலமான எண்ம பணப் பரிவா்த்தனை இதுவரை இல்லாத வகையில் ரூ. 25.14 லட்சம் கோடியாக பதிவாகியுள்ளது. இது முந்தைய மாதத்தைவிட 5 சதவீதம் அதிகமாகும். கடந்த ஏப்ரலில் யுபிஐ பரிவா்த்தனை மதிப்பு ரூ. 23.94 லட்சம் கோடியாக இருந்தது.