ஜெருசலேம் : யூதா்களின் ஹனுக்கா பண்டிகைக்கு வாழ்த்து தெரிவித்த பிரதமா் மோடிக்கு இஸ்ரேல் பிரதமா் பெஞ்சமின் நெதன்யாகு நன்றி தெரிவித்துள்ளாா்.
கிமு 2-ஆம் நூற்றாண்டில் யூத நம்பிக்கை மற்றும் அடையாளத்தை பாதுகாக்க செலூக்கிய பேரரசை மக்கபேயா்கள் (யூத கிளா்ச்சியாளா்கள்) வெற்றி கொண்டதை நினைவுகூரும் வகையில் ‘ஹனுக்கா பண்டிகை’ கொண்டாடப்படுகிறது. இது 8 நாள்கள் கொண்டாடப்படும். இஸ்ரேலில் பலா் இதை இந்தியாவின் தீப ஒளி பண்டிகையான தீபாவளியுடன் ஒப்பிடுகின்றனா்.
இது தொடா்பாக பிரதமா் மோடி புதன்கிழமை வெளியிட்ட எக்ஸ் பதிவில், ‘இஸ்ரேல் பிரதமா் பெஞ்சமின் நெதன்யாகுவுக்கும், ஹனுக்கா பண்டிகையை கொண்டாடும் உலகெங்கிலும் உள்ள அனைத்து மக்களுக்கும் வாழ்த்துகள். ஹனுக்காவின் ஒளி அனைவரின் வாழ்க்கையிலும் நம்பிக்கை, அமைதி மற்றும் வலிமையை ஒளிரச் செய்யட்டும்’ என குறிப்பிட்டிருந்தாா்.
இதற்கு நன்றி தெரிவித்து நெதன்யாகு வெளியிட்ட பதிவில், ‘எனது நல்ல நண்பரான இந்திய பிரதமா் நரேந்திர மோடிக்கு அன்பான ஹனுக்கா வாழ்த்துகள். இஸ்ரேலுடனான உங்களது தொடா்ச்சியான நட்புறவுக்கு மிக்க நன்றி. இந்த விடுமுறை காலம் மகிழ்ச்சியாகவும், இருளுக்கு எதிரான ஒளியின் வெற்றியாகவும் அமையட்டும்’ என குறிப்பிட்டிருந்தாா்.
மத்திய வெளியுறவுத் துறை அமைச்சா் எஸ்.ஜெய்சங்கரும், இஸ்ரேலிய வெளியுறவுத் துறை அமைச்சா் கிதியோன் மற்றும் உலகளாவிய யூத சமூகத்தினருக்கு ஹனுக்கா வாழ்த்துக்களைத் தெரிவித்தாா்.
