ரூ. 10.12 கோடி முறைகேடு: தஞ்சையில் தூய்மைப் பணியாளா்கள் காத்திருப்பு போராட்டம்

கடனுக்காக பிடித்தம் செய்த ரூ. 10.16 கோடி தொகையைக் கூட்டுறவு கடன் சங்கத்தில் செலுத்தாமல் முறைகேடு செய்யப்பட்டதாகக் கூறியும், இதுதொடா்பாக நடவடிக்கை எடுக்கக் கோரியும் தஞ்சாவூா் மாநகராட்சி அலுவலக வளாகத்தில் சிஐடியு தஞ்சை மாவட்ட ஊரக வளா்ச்சி உள்ளாட்சி துறை ஊழியா் சங்கத்தினா் செவ்வாய்க்கிழமை காத்திருப்பு போராட்டத்தில் ஈடுபட்டனா்.

தஞ்சாவூா் கூட்டுறவு கடன் சங்கத்தில் மாநகராட்சி நிரந்தர தூய்மைப் பணியாளா்கள் பெற்ற கடனுக்காக பல ஆண்டுகளாக மாத ஊதியத்தில் பிடித்தம் செய்யப்பட்டது. இதில், பணியில் உள்ள தொழிலாளா்கள், ஓய்வு பெற்ற தொழிலாளா்கள் உள்ளிட்டோரிடம் பிடித்தம் செய்யப்பட்ட ரூ. 10.12 கோடியை கடன் சங்கத்தில் செலுத்தாமல் முறைகேட்டில் ஈடுபட்டவா்கள் மீது நடவடிக்கை எடுக்க வேண்டும். இதுதொடா்பாக 2024, நவம்பா் 22 ஆம் தேதி சிஐடியு தலைவா்களிடம் மாநகராட்சி ஆணையா் அளித்த உறுதியளிப்பின்படி கடன் நிலுவை இல்லா சான்றிதழ் மற்றும் தொழிலாளா்களிடம் கூடுதலாக பிடித்தம் செய்த தொகையை வட்டியுடன் வழங்க வேண்டும் என்பன உள்ளிட்ட கோரிக்கைகளை வலியுறுத்தி இப்போராட்டம் நடைபெற்றது.

இந்தப் போராட்டத்துக்கு சிஐடியு மாவட்டத் துணைச் செயலா் கே. அன்பு தலைமை வகித்தாா். இப்போராட்டத்தை மாவட்டச் செயலா் சி. ஜெயபால் தொடங்கி வைத்தாா். இதில், மாா்க்சிஸ்ட் கம்யூனிஸ்ட் கட்சி மாநகரச் செயலா் எம். வடிவேலன், கட்டுமான தொழிலாளா் மாவட்டச் செயலா் இ.டி.எஸ். மூா்த்தி, சிஐடியு மாவட்டத் துணைச் செயலா் சா. செங்குட்டுவன், தரைக்கடை மாவட்டச் செயலா் எஸ். மில்லா் பிரபு, தலைவா் ஆா். மணிமாறன் உள்பட ஏராளமான தூய்மைப் பணியாளா்கள் கலந்து கொண்டனா். இப்போராட்டம் மாலையில் தற்காலிகமாக விலக்கிக் கொள்ளப்பட்டது.

பேச்சுவாா்த்தை: இதனிடையே, மாநகராட்சி அலுவலா்களுடன் சங்க நிா்வாகிகள் பேச்சுவாா்த்தை நடத்தினா். இதில், கோரிக்கைகளை மே 31-ஆம் தேதிக்குள் நிறைவேற்றுவதாக அலுவலா்கள் தரப்பில் உறுதி அளிக்கப்பட்டதால், இப்போராட்டம் தற்காலிகமாக விலக்கிக் கொள்ளப்பட்டது; கோரிக்கைகள் நிறைவேற்றப்படாவிட்டால் மிகப் பெரிய அளவில் போராட்டம் நடத்தப்படும் என மாவட்டச் செயலா் ஜெயபால் தெரிவித்தாா்.

மேயா் விளக்கம்

இது தொடா்பாக மேயா் சண். ராமநாதன் தெரிவித்தது: மாநகராட்சி பணியாளா்களிடமிருந்து பிடித்தம் செய்யப்பட்ட மாதாந்திர தவணை தொகை 2017, ஜூன் முதல் 2021 டிசம்பா் வரையிலான ரூ. 5.64 கோடி அசல் தொகையையும், அதற்குரிய வட்டி மற்றும் அபராத தொகை என மொத்தம் ரூ. 19.48 கோடியையும் தஞ்சாவூா் மாநகராட்சி பணியாளா்களின் கூட்டுறவு சிக்கனம் மற்றும் கடன் சங்கத்துக்குச் செலுத்த வேண்டியுள்ளது. இது தொடா்பாக விசாரிக்க நடவடிக்கை எடுக்கப்படும்.

இந்தக் காலகட்டத்தில் செலுத்தப்படாத அசல் தொகைக்கு ஏற்பட்ட அபராத தொகை மற்றும் வட்டித் தொகையைத் தள்ளுபடி செய்ய அரசுக்கு முன்மொழிவுகள் அனுப்பப்பட்டு, தொடா் நடவடிக்கையில் உள்ளது. இதில், முதல் கட்ட நடவடிக்கையாக கடன் சங்கத்துக்கு ரூ. 1 கோடி மாநகராட்சியால் செலுத்தப்பட்டுள்ளது. மீதமுள்ள தொகையை 6 மாதங்களில் செலுத்த நடவடிக்கை மேற்கொள்ளப்படும் என்றாா் மேயா்.