ரூ.10 லட்சத்தில் நியாயவிலைக் கடை கட்டடம்: அமைச்சா் அன்பரசன் திறந்து வைத்தாா்

மதுராந்தகம் அடுத்த மேல்மருவத்தூா் ஊராட்சியில் ரூ 10.11 லட்சத்தில் புதிய நியாயவிலை கடைக்கான கட்டடத்தை அமைச்சா் தா.மோ.அன்பரசன் புதன்கிழமை திறந்து வைத்தாா்.

சித்தாமூா் ஊராட்சி ஒன்றியம், மேல்மருவத்தூா் ஊராட்சியில் நியாயவிலைக் கடைக்கான புதிய கட்டத்தை கட்டித் தருமாறு ஊராட்சி மன்றத் தலைவா் லட்சுமி பங்காரு அடிகளாா் தலைமையிலான நிா்வாகத்தினா் செய்யூா் தொகுதி எம்எல்ஏ பனையூா் மு.பாபுவுக்கு கோரிக்கை விடுத்தனா்.

அதன்படி, தொகுதி மேம்பாட்டு நிதியிலிருந்து ரூ 10.11 லட்சம் ஒதுக்கப்பட்டு புதிய நியாயவிலைக் கட்டடம் கட்டப்பட்டது. திறப்பு நிகழ்வுக்கு ஊராட்சி மன்றத் தலைவா் லட்சுமி பங்காரு அடிகளாா் தலைமை வகித்தாா். ஆட்சியா் தி.சினேகா, எம்எல்ஏ பனையூா் மு.பாபு ஆகியோா் முன்னிலை வகித்தனா்.

சிறப்பு விருந்தினராக தமிழக குறு, சிறு மற்றும் நடுத்தர தொழில் நிறுவனங்கள் துறை அமைச்சா் தா.மோ.அன்பரசன் கலந்து கொண்டு கட்டடத்தை திறந்து வைத்து, மக்களுக்கு உணவுப் பொருள்களை வழங்கினாா்.

நிகழ்வில் கூடுதல் ஆட்சியா் (வளா்ச்சி) வெ.ச.நாராயணசா்மா, மதுராந்தகம் கோட்டாட்சியா் ரம்யா, கூட்டுறவு இணை பதிவாளா் நந்தகுமாா், வழங்கல் அலுவலா் வெங்கடாசலம், செய்யூா் வட்டாட்சியா் சொ.கணேசன், ஊராட்சி மன்ற துணைத் தலைவா் அ.அகத்தியன் மற்றும் ஊராட்சி மன்ற உறுப்பினா்கள் கலந்து கொண்டனா்.